Погледнете го новото издание на емисијата „360 степени”, емитувано на 26 октомври 2026 г. на МРТ 1, во кое гостуваат новинарките Оливера Трајковска и Ана Петрушева
Во новото издание на „360 степени“ на МРТ 1, со новинарките Оливера Трајковска (емисија „Вин-вин” на Телма) и Ана Петрушева (БИРН Македонија) разговараме за политичкиот пресврт во Србија и за предизвиците што ја очекуваат Студентската листа по победата над Александар Вучиќ и неговата СНС. Соговорничките сметаат дека студентското движење, преку поинаков начин на комуникација и теренска работа, успеало да ги мобилизира граѓаните и да ја врати вербата дека нивниот глас може да донесе промена. Според нив, студентите успеале да ги поразат и власта и традиционалната опозиција, која не нашла одговор на новата политичка динамика. Во дебатата се отвори и прашањето кој ќе ја води идната српска влада и како победничката листа, составена главно од луѓе со малку институционално искуство, ќе ги оствари најавените промени. Соговорничките укажаа на предизвиците во преземањето и реформирањето на институциите, особено безбедносните служби, полицијата, обвинителството и јавниот сервис. Според Петрушева, клучен тест за новата власт ќе биде справувањето со неказнивоста, додека Трајковска оцени дека напредокот на Србија во владеењето на правото може да создаде нова динамика и во европската интеграција на регионот. Победата на студентското движење, сметаат соговорничките, носи порака и за другите земји во регионот – дека младите се активни, имаат свои барања и очекуваат промени од властите.