Запрашан дали АД ЕСМ ќе понуди пониска или повисока цена од досегашните 65 евра за мегават-час, премиерот укажа дека во сегашните берзански услови, таа цена е дури трипати пониска од онаа што ја плаќаат граѓаните во соседството и во Европа
Цената на електричната енергија за граѓаните ќе остане иста до крајот на годината и нема да има никакво поскапување. Ова го истакна премиерот Христијан Мицкоски одговарајќи на новинарски прашања за постапката за формирање на цената на струјата што пред Регулаторната комисија за енергетика (РКЕ) ја покренуваат енергетските компании.
Тој рече дека одржувањето на енергетската стабилност и заштитата на стандардот на граѓаните се одвиваат во услови на најголема светска енергетска криза, кога цените на берзите во регионот и Европа рушат рекорди.
„Секаде во регионот и во Европа цените на енергенсите пробиваат рекорди. Има држави во Европа каде цената на дизелот е над три евра, додека кај нас е под 1,6 евра благодарение на мерките на Владата. Во таа насока планираме да продолжиме и за електричната енергија – се бориме и наш приоритет е цената да остане иста и да нема зголемување“,
истакна Мицкоски.
Запрашан дали АД ЕСМ ќе понуди пониска или повисока цена од досегашните 65 евра за мегават-час, премиерот укажа дека во сегашните берзански услови, таа цена е дури трипати пониска од онаа што ја плаќаат граѓаните во соседството и во Европа.
Тој додаде дека конечната цена не зависи исклучиво од ЕСМ, туку од барањата на повеќе субјекти во системот, вклучително и операторот и приватниот дистрибутер ЕВН.
„Цената останува иста до крајот на годината, односно и во ноември и во декември. А, за тоа што ќе се случува од 1 јануари, да почекаме да видиме што ќе кажат енергетските компании. Јас не можам да ја прејудицирам одлуката на Регулаторната комисија“,
додаде тој.
Премиерот исто така потврди дека Владата во моментов не планира никакви измени во тарифните блокови за пресметка на електричната енергија за домаќинствата.