Оттаму апелираат Владата да не прифаќа индивидуално договарање за користењето на неработните денови, како и да се задржи дополнителниот неработен ден кога празникот паѓа во недела
Ниту работодавачите ниту Стопанската комора не треба да одлучуваат кој и под какви услови може да користи празник како неработен ден – реагираат од Мрежата за заштита од дискриминација, противејќи се на предлогот на Стопанската комора за кратење на бројот на неработни денови и за нивно индивидуално договарање помеѓу работниците и работодавачите.
„Користењето на работничките права не смее да зависи од волјата на работодавачот или од преговарачката позиција на работникот, особено имајќи предвид дека работниците со пониски примања и несигурни форми на вработување се најизложени на притисоци. Работничките права мора да бидат заштитени со закон и колективни договори. Индивидуалното договарање за користење на неработните денови може да доведе до ситуации во кои работниците, стравувајќи за своето работно место, ќе се откажуваат од правата што им следуваат. Правата на работниците мора да останат загарантирани и да не зависат од поединечни договори“,
велат од Мрежата за заштита од дискриминација.
Оттаму додаваат дека секоја евентуална измена треба да биде предмет на социјален дијалог меѓу Владата, синдикатите и работодавачите и апелираат Владата да не прифаќа индивидуално договарање за користењето на неработните денови, како и да се задржи дополнителниот неработен ден кога празникот паѓа во недела.
Од Мрежата за заштита на дискриминација порачаа подобрената продуктивност нема да се постигне со намалување на работничките права, туку со инвестиции, подобра организација на работата, безбедни услови за работа, достоинствени плати, силни колективни договори и вистински социјален дијалог.