Министерот за здравство Сашо Клековски предупреди дека Македонија и регионот имаат двојно поголема предвремена смртност кај населението на возраст од 30 до 70 години во споредба со остатокот од Европа
Рече дека сака да ја обнови расправата за воведување едноставни здравствени контроли како мерење гликемија и крвен притисок во аптеките каде што има обучен медицински кадар или фармацевти, со цел подобрување на пристапноста до прегледи
Од болести на кардиоваскуларниот систем минатата година во Македонија починале 6 888 лица. Овие заболувања учествуваат со 34 проценти од вкупниот морталитет и се на прво место меѓу причините за смртност, вели директорката на Институтот за јавно здравје (ИЈЗ), Марија Андоновска, на денешното одбележување на Светскиот ден на срцето.
Институтот за јавно здравје (ИЈЗ) денеска организира бесплатни превентивни прегледи за граѓаните со цел подигнување на свеста за заболувањата на срцето, односно кардиоваскуларните заболувања, бидејќи сите претставуваат водечка причина за смртност во светот.
Директорката на ИЈЗ, Андоновска, истакна дека целта на теренските активности е подигнување на свеста за раната превенција и навремено препознавање на ризик-факторите како што се високиот крвен притисок, зголемениот шеќер во крвта, прекумерната телесна тежина и физичката неактивност.
Министерот за здравство Сашо Клековски, кој го посети пунктот за прегледи, предупреди дека Македонија и регионот имаат двојно поголема предвремена смртност кај населението на возраст од 30 до 70 години во споредба со остатокот од Европа.
„Сите овие работи може да се превенираат и рано откријат со едноставни работи. На пример мерењето притисок, тоа е едноставна работа, само треба да ја практикуваме, бидејќи високиот крвен притисок е еден од најтивките убијци, условно да кажам, кој влијае и на срцевото здравје, и на бубрежното здравје, и на мозочното здравје. Заедно со нерегулираниот дијабет стануваат главни контрибутори во срцеви, мозочни и бубрежни заболувања“,
рече Клековски повикувајќи ги луѓето секојдневно да го мерат крвниот притисок и тежината.
Во врска со тоа дали се планираат задолжителни прегледи, мерки, промена во систематските прегледи со цел навреме да можат да стигнат тие ризични категории до лекарска помош, тој посочи дека мора многу почесто да се говори на таа тема, бидејќи присилните мерки не ги даваат саканите ефекти.
Смета дека систематските прегледи, кои го опфаќаат работоспособното население, имаат многу формална имплементација, вклучувајќи и неследење на резултатите од тие прегледи.
Клековски вели дека во претстојната измена на Законот за медицински евиденции ќе се гледа како тие резултати да бидат интегрирани во досието на секој пациент за да не бидат изгубени по нивното правење.
„Ќе видиме дали на нив можеме да додадеме евтини, пристапни процедури кои може да помогнат во раното откривање на одредени состојби, и не само на кардиоваскуларни, туку и на други состојби, бидејќи најголемиот трошок со систематскиот е самото одење на доктор. Тогаш да видиме дали можеме нешто повеќе да направиме“,
рече Клековски.
Рече дека сака да ја обнови расправата за воведување едноставни здравствени контроли како мерење гликемија и крвен притисок во аптеките каде што има обучен медицински кадар или фармацевти, со цел подобрување на пристапноста до прегледи.
„Во основа, еден систем кој беше заснован за да вработиме повеќе доктори и медицински сестри веќе не е одржлив бидејќи ниту едното, а посебно медицински сестри ќе нема. Значи, тогаш треба да видиме што сѐ е достапно како здравствени капацитети и да го ослободиме за употреба. Јас сум го говорел и во други прилики: ако има доктор – доктор, ако има сестра – сестра, ако има фармацевт – фармацевт. Значи има законска можност, треба да се регулираат условите и стандардите на тоа правење. И ова не е ништо страшно, бидејќи дел од овие тестирања се и самотестирања“,
додаде Клековски.
Одговарајќи на новинарско прашање дали тие мерења на притисокот и шеќерот во крв би биле во сите аптеки, Клековски рече дека за тоа ќе треба да се одредат стандардите.
Во врска со тоа колку граѓаните се заинтересирани за контролите, рече дека е малку и самокритичен.
„Мора да си ги вреднуваме животите повеќе, бидејќи самите ако не си ги вреднуваме, не можеме да очекуваме некој друг да ги вреднува. Значи мора да говориме за тоа, мора да најдеме некој модел да ги менаџираме главните ризици: стрес, исхрана, алкохол, цигари… Така што мора да говориме многу повеќе на овие теми“,
додаде Клековски.