Според директорот на СОЗР, Ивица Томовски, за целосно да се нормализира функционирањето на објектот можеби ќе бидат потребни од пет до шест дена
Пукната топловодна цевка предизвикала поплава во поранешната зграда на „Нова Македонија“, во која сега се сместени повеќе владини институции. Цевката што пукнала била на вториот кат од зградата.
Поплавата се случила ноќеска околу полноќ, по што веднаш реагирало обезбедувањето на Министерството за внатрешни работи (МВР), а струјата во објектот веднаш била исклучена од безбедносни причини.
Директорот на Службата за општи и заеднички работи (СОЗР), Ивица Томовски, вели дека веднаш биле испратени екипи кои почнале со санирање на дефектот.
Томовски вели дека се активирани агрегатите во објектот, но за целосно да се врати во функција ќе треба да се добие позитивно мислење од ЕВН.
„Цевката се наоѓа на вториот кат од зградата. Се активираа агрегатите, но целосната функција ќе се врати веднаш штом се санира влагата и се приклучи струјата, за која треба да добиеме позитивно мислење од ЕВН. Бидејќи водата течела низ инсталациите за струја и е ризично“,
вели Томовски во изјава за „360 степени“.
Според Томовски, за целосно да се нормализира функционирањето на објектот можеби ќе бидат потребни од пет до шест дена.
Инаку, во зградата на „Нова Македонија“ се сместени Министерството за образование и наука, Државниот просветен инспекторат, Државната изборна комисија, делови од Министерството за економија и труд, како и други агенции и управи.