„По стапување на должноста, од наша страна беа согледани дел од недостатоците и предизвиците со кои се соочува институцијата. Токму поради потребата од целосен и независен увид во состојбите, беше поднесено барање за спроведување ревизија до ДЗР“, изјави директорот на ДПИ, Влатко Стојкоски
Државниот пазарен инспекторат активно работи на надминување на констатираните слабости и на воспоставување поефикасен и пофункционален систем на работа – изјави денеска директорот на ДПИ, Влатко Стојкоски, по извештајот во кој Државниот завод за ревизија (ДЗР) изрази неповолно мислење за објективноста на финансиските извештаи на ДПИ за 2024 година и мислење со резерва за усогласеноста на работењето со законската регулатива.
„Државниот пазарен инспекторат презема конкретни активности за отстранување на утврдените недостатоци, зајакнување на човечките капацитети, подобрување на финансиската и материјалната евиденција, како и унапредување на инспекциските постапки и дигиталните процеси“,
изјави првиот човек на ДПИ, Влатко Стојкоски.
Тој информира дека особено внимание се посветува на кадровското екипирање на Инспекторатот и зајакнување на инспекторските капацитети, како и на дигитализација во работењето на ДПИ со поддршка на ЕУ. Вели дека во тек е подготовка на софтверско решение за сите работни процеси во Инспекторатот, како и унапредување на финансиското и материјалното работење и евиденциите во ДПИ. Институцијата ќе продолжи да работи и на зајакнување на капацитетите за контрола и обезбедување услови за континуирани лабораториски испитувања.
„Преземените активности за надминување на утврдените недостатоци се започнати од 2025 година, додека ревидираниот период опфатен со извештајот е 2023–2024 година. По стапување на должноста, од наша страна беа согледани дел од недостатоците и предизвиците со кои се соочува институцијата. Токму поради потребата од целосен и независен увид во состојбите, беше поднесено барање за спроведување ревизија до ДЗР“,
рече директорот на Пазарниот инспекторат и ја поздрави работата на ДЗР, како и дадените препораки.
Државниот завод за ревизија вчера објави извештај во кој укажа на недоволен кадар, недовршена дигитализација, слабости во финансиското и материјалното работење на Државниот пазарен инспекторат, како и недоволно обезбедени услови за континуирана контрола на небезбедни производи.