„Ќе работиме на примена на вештачката интелигенција во обработката на собраниските документи, стенограмите и аудиовизуелните материјали, како и на развој на алатки за анализа на предлог-закони, машински превод и создавање база на знаење за националното и европското законодавство“, најави собранискиот спикер Африм Гаши
Собранието и Факултетот за информатички науки и компјутерско инженерство (ФИНКИ) денеска потпишаа Меморандум за соработка за воведување и примена на вештачката интелигенција во процесите на парламентот.
Потпишувањето на Меморандумот, според собранискиот спикер Африм Гаши, е голем чекор напред кон остварување на сонот за дигитализирано Собрание и модернизација во работата на законодавниот дом.
„Отвораме ново поглавје во модернизацијата и дигитализацијата на работата на Собранието. Преку ова партнерство, поврзано и со проектот ‘Везилка’, ќе работиме на примена на вештачката интелигенција во обработката на собраниските документи, стенограмите и аудиовизуелните материјали, како и на развој на алатки за анализа на предлог-закони, машински превод и создавање база на знаење за националното и европското законодавство. Верувам дека со поврзување на науката и институциите можеме да создадеме конкретни решенија кои ќе придонесат за помодерно, поефикасно и потранспарентно Собрание, во служба на граѓаните“,
порача претседателот на Собранието, Африм Гаши.
Според деканот на ФИНКИ, Петре Ламески, реализацијата на иницијативите на двете институции ќе дадат додадена вредност за општеството. Од една страна, како што вели, Собранието ќе добие квалитетен истражувачки кадар, кој ќе работи на реални проблеми, а студентите ќе работат со реални податоци од Собранието и нивна обработка.