Кога новинарката Бетси Клајн од Си-ен-ен утринава пристигнала во Белата куќа, каде што Трамп одржа обраќање пред новинарите во Овалната соба, ѝ бил одбиен пристапот и ѝ биле одземени новинарските акредитации. Со ист третман се соочиле и новинарите на „Политико“ и на Ем-ес нау. Клајн вели дека агент на Тајната служба ѝ рекол оти акредитацијата ѝ е деактивирана и дека не може да влезе во Белата куќа
На новинарите на Си-ен-ен, „Политико“ и Ем-ес нау утринава им беше забранет влез во Белата куќа.
Потегот следува еден ден откако Доналд Трамп објави дека им забранува пристап до Белата куќа на новинарски екипи на трите медиумски куќи, обвинувајќи ги дека дека пласираат лажни вести за неговата администрација.
Кога новинарката Бетси Клајн од Си-ен-ен утринава пристигнала во Белата куќа, каде што Трамп одржа обраќање пред новинарите во Овалната соба, ѝ бил одбиен пристапот и ѝ биле одземени новинарските акредитации. Со ист третман се соочиле и новинарот на „Политико“ и новинарот и фоторепортерот на Ем-ес нау. Клајн вели дека агент на Тајната служба ѝ рекол оти акредитацијата ѝ е деактивирана и дека не може да влезе во Белата куќа.
„Го прашав дали може да ми даде објаснување зошто е деактивирана. Тој рече дека нема дополнителни информации. Го прашав уште еднаш дали има дополнителни детали што може да ги сподели со мене, а тој рече дека треба да се обратам до прес-центарот на Белата куќа“,
изјави новинарката Бетси Клајн од Си-ен-ен.
Трите медиумски куќи најавија дека ќе преземат правни чекори за да заштитат правата на своите новинари.
„Нашата мисија да известуваме од американската влада ќе продолжи без оглед на какви било обиди за ограничување на физичкиот пристап до Белата куќа и другите владини згради или какви било други обиди за попречување на нашето новинарство. Според Уставот на САД, имаме право да известуваме без пречки или мешање од владата. Забраната е нелегален напад врз ова фундаментално право“,
порачаа од Си-ен-ен.
Извршниот директор на Комитетот на новинари за слобода на медиумите, Брус Браун, изјави дека одлуката на Трамп да им го забрани пристапот до Белата куќа на трите медиумски куќи е апсолутно неуставна. Повикувајќи се на првиот амандман од Уставот на САД, Браун вели дека кога еднаш ќе им даде акредитации на новинарите, Белата куќа не може да им го забрани пристапот затоа што не ѝ се допаѓа нивното известување. Ова, како што вели, е класичен пример за дискриминација, а судовите брзо би ја поништеле одлуката доколку биде оспорена.
Американскиот претседател најави дека пристапот до Белата куќа би можел да им биде ограничен и на други медиумски организации, меѓу кои „Њујокт тајмс“ и „Вашингтон пост“.