Трамп на својата социјална мрежа Трут соушл напиша дека забраната е резултат на нивното „постојано известување за лажни вести“. Најави дека пристапот би можел да им биде ограничен и на други медиумски организации, меѓу кои ги спомена „Њујокт тајмс“ и „Вашингтон пост“
Американскиот претседател Доналд Трамп објави дека им забранува пристап до Белата куќа на новинарските екипи на Си-ен-ен, Ем-си нау и „Политико“, наведувајќи дека одлуката стапува во сила „веднаш“.
Засега, како што објави Си-ен-ен, нема индикации дека администрацијата презела конкретни чекори за спроведување на забраната.
Извор запознаен со ситуацијата изјавил дека и дел од вработените во Белата куќа биле затекнати од најавата, вклучително и членови на тимот за односи со јавноста, кои морале дополнително да утврдат како би се спровела одлуката.
Новинарите на Си-ен-ен во вчеравечер останале во просториите во Белата куќа, додека екипа на телевизијата патувала како дел од новинарскиот тим што го следи потпретседателот Џеј-Ди Венс.
Организации за заштита на слободата на печатот оценија дека евентуалната забрана би била неуставна и би можела да биде поништена од судовите.
Си-ен-ен соопшти дека целосно стои зад својот тим во Белата куќа и неговото, како што наведува, фер и точно известување, додавајќи дека Уставот на САД му гарантира право на медиумот да известува без владино мешање.
И „Политико“ соопшти дека ќе продолжи да известува за актуелната и идните администрации и дека ќе ги брани правата загарантирани со Првиот амандман. Ем-си нау во моментот на објавувањето на Трамповата изјава немаше коментар.
Здружението на новинари акредитирани во Белата куќа, кое го претставува новинарскиот корпус, изрази солидарност со медиумите што беа посочени од Трамп.
Трамп на својата социјална мрежа Трут соушл напиша дека забраната е резултат на нивното „постојано известување за лажни вести“. Најави дека пристапот би можел да им биде ограничен и на други медиумски организации, меѓу кои ги спомена „Њујокт тајмс“ и „Вашингтон пост“.
„Гордо објавувам дека им забранувам пристап во Белата куќа на Си-ен-ен, Ем-си нау и ‘Политико‘. Причината е нивното постојано известување со лажни весто! Медиумите не смеат постојано да пишуваат или известуваат фикција и лаги кога известуваат за претседателот на САД, за администрацијата на Трамп или за Соединетите Американски Држави. Ќе следат и други медиуми што шират лажни вести“,
се вели во објавата на Трамп.
Трамп не прецизираше какви конкретни мерки биле преземени за ограничување на пристапот на трите медиуми, ниту наведе конкретен прилог или известување што ја предизвикало неговата одлука.
Според него, забраната би можела да биде укината доколку медиумите „се поправат“ и почнат да објавуваат поповолни извештаи за неговата администрација.
Најавата на Трамп ја критикуваа и повеќе демократи во Конгресот. Лидерот на малцинството во Сенатот, Чак Шумер, ја спореди со постапки на диктаторски режими и оцени дека не смее да се ограничува известувањето за да се контролира јавниот наратив.
Трамп и во минатото преземал мерки за ограничување на пристапот на медиумите до Белата куќа.
За време на неговиот прв мандат, Белата куќа му ја одзеде акредитацијата на Џим Акоста, тогашниот главен дописник на Си-ен-ен од Белата куќа, по расправија со Трамп на прес-конференција во ноември 2018 година.
Тогаш Си-ен-ен поднесе тужба, а федерален судија привремено му го врати пристапот на Акоста, оценувајќи дека биле прекршени неговите процедурални права. Акредитацијата подоцна му беше трајно вратена, по што Си-ен-ен ја повлече тужбата.
Во 2025 година, Белата куќа накратко го ограничи учеството на агенцијата „Асошиејтед прес“ (АП) во таканаречениот „прес-пул“, што доведе до правен спор со агенцијата.
На новинарите и фоторепортерите на АП подоцна им беше вратен пристапот, а судскиот процес продолжи.