Во синоќешното интервју за МРТ, министерот за внатрешни работи рече дека се надева оти случајот ќе дејствува превентивно на сите што евентуално би се охрабриле да направат ваков или каков било сличен прекршок
Министерот за внатрешни работи Панче Тошковски очекува законита, праведна и правична одлука во врска со случајот со фалсификувани возачки дозволи, кој, како што вели, сега е во рацете на обвинителството и судот. Во синоќешното интервју за МРТ, министерот рече дека се надева оти случајот ќе дејствува превентивно на сите што евентуално би се охрабриле да направат ваков или каков било сличен прекршок.
„Според информациите што ги имам, има добри искази од страна на некои од луѓето што се инволвирани во постапката. Некои од нив се чесни и совесни – рекоа дека учествувале во рамки на постапка на некакво преговарање. МВР има поставено систем, каде што се детектираат сите незаконски промени на одредени податоци, така што многу лесно може да се детектира ваков вид незаконитост, која е сторена од страна на полициските службеници. Можеби ќе треба време за тоа да се истражи, можеби ќе треба соодветна посветеност на вработените од Одделот за внатрешна контрола, но покажавме и во овој случај, како и во сите други, дека секаде каде што ќе детектираме незаконито поведение, соодветно ќе реагираме“,
изјави Тошковски во гостувањето на МРТ.
Во рамки на случајот се поднесени кривични пријави против 27 лица, вклучително и вработена во МВР, поради сомнение за незаконско внесување категории во возачките дозволи, нивно издавање и употреба.
Министерот вели дека осомничената вработена, која претходно исто така била вмешана во други фалсификувања, но со судска одлука била вратена на работа, она што го сторила во овој случај буквално е загрозување на животот на секој од нас. Се работи, вели тој, за страшно кривично дело од аспект на последиците што може да ги предизвика, бидејќи службеничката незаконски им овозможувала да добијат возачка дозвола за управување со автобус, тешки товарни возила на лица што никогаш не положиле за соодветната категорија.
Тошковски оцени дека при одлучувањето за кривични дела од ваков тип, судовите во иднина треба да имаат предвид и поширок превентивен ефект, а одлуките што ги носат да не се однесуваат единствено на конкретните осомничени лица, туку да испратат порака и до сите потенцијални сторители дека злоупотребата на законот и постапките што можат да го загрозат населението ќе бидат соодветно санкционирани.