Министерот за внатрешни работи, Панче Тошковски денеска од Велес посочи дека основната цел на системот „Безбеден град“не е зголемување на приходите во државниот буџет, туку промена на сообраќајните навики и спасување човечки животи
Според податоците што ги презентираше тој, најголем дел од казните се за возење со брзина поголема од пропишаната, а само мал дел, односно три-четири казни се однесуваат на случаи на поминување на црвено светло
Системот „Безбеден град“ од вчера официјално функционира и на подрачјето на Секторот за внатрешни работи Велес, кое покрај овој град ги опфаќа и Кавадарци, Неготино и Демир Капија.
Министерот за внатрешни работи Панче Тошковски, кој по повод имплементацијата на системот и на ова подрачје денеска беше во Велес, информира дека во текот на вчерашниот ден биле констатирани околу 124 прекршоци, а до денеска напладне биле изречени уште 27 казни, со што вкупниот број достигнал 151 казна за само ден и половина.
Според податоците што ги презентираше тој, најголем дел од казните се за возење со брзина поголема од пропишаната, а само мал дел, односно три-четири казни се однесуваат на случаи на поминување на црвено светло.
„Тоа е фрапантно подобрување на почитувањето на сообраќаните правила од страна на македонските граѓани“,
рече министерот.
Заблагодарувајќи им се на граѓаните за одговорното однесување и почитувањето на сообраќајните правила, Тошковски посочи дека основната цел на системот „Безбеден град“не е да ги зголеми приходите во државниот буџет, туку промена на сообраќајните навики и спасување човечки животи.
„Покажавме дека навистина можеме да се однесуваме европски. Позитивните ефекти од таквото однесување се многу помал број жртви, многу помал број сообраќајни незгоди и многу помалку негативни последици од непочитувањето на сообраќајните правила“,
кажа тој.
Во тој контекст, министерот за внатрешни работи презентираше податоци, според кои, во првите осум месеци од минатата година на патиштата во земјава животите ги загубиле 96 лица, додека во истиот период оваа година бројот се намалил на 61 жртва, или за околу 40 проценти.
Повикувајќи се на информации што ги добил од експерти, Тошковски рече дека доколку се продолжи во истиот манир, со почитување на сообраќајните прописи од сите граѓани, земјава може да стане пример не само во Европа, туку и во светот по намален број на сообраќајни несреќи со жртви.
Министерот се осврна и на последиците од непочитувањето на сообраќајните правила, посочувајќи дека трагичните сообраќајни незгоди се реалност која може да го погоди секого. Притоа ја посочи вчерашната сообраќајна незгода на патот Миладиновци – Аеродром, во која две лица починаа на самото место, а три лица се повредени, од кои две се во особено тешка, животозагрозувачка состојба.
„Сето ова што ни се случува поврзано со сообраќајните незгоди не е некаде далеку. Тоа е тука и може да му се случи на секого. Повторувам, никогаш немаме сообраќајна незгода со смртни последици доколку се почитуваат сообраќајните правила. Ова треба навистина да допре до сите“,
рече министерот за внатрешни работи.
Инаку, опремата за системот „Безбеден град“ за подрачјето на СВР Велес е сместена во новиот команден центар на Секторот, кој се наоѓа во простории што претходно ги користело Министерството за одбрана, а потоа околу 15 до 20 години не биле употреба. Реконструираните и целосно реновирани простории на новиот команден центар денеска заедно со Тошковски ги посети и премиерот Христијан Мицкоски.