„Местото каде е подметнат пожарот е утврдено, гранките се сечени со секира, најдена е запалка. Многу индиции за намерно предизвикување пожар“, вели градоначалникот на Општина Босилово, Ристо Манчев
Додека траела битката со огнената стихија во Иловица, околу 17:30 часот пожар избувнал во погон за обработка на картон во селото Колешино, кој по интервенцијата на поголем број пожарникари и возила на ТППЕ Струмица бил ставен под контрола и успешно локализиран
Струмичките пожарникари вчера изгаснале два големи пожари, од кои едниот во селото Иловица, каде огнот се приближил на само стотина метри од првите куќи. Другиот пожар бил во селото Колешино кој зафатил погон за обработка на картон.
Градоначалникот на Општина Босилово, Ристо Манчев, во објава на социјалните мрежи, вели дека постојат индиции оти пожарот во Иловица бил намерно предизвикан и дека благодарение на брзата реакција на голем број граѓани, противпожарната служба и МВР е избегната катастрофа.
„Изгорена е поголема површина на сува трева и грмушки. Пожарот беше само на стотина метри од првите куќи и среќа во несреќа е што ветерот дуваше во спротивен правец од селото. Местото каде е подметнат пожарот е утврдено, гранките се сечени со секира, најдена е запалка. Многу индиции за намерно предизвикување пожар“,
напиша Манчев на Фејсбук.
Според објавата на струмичката Теирторијална противпожарна едница, пожарот избувнал вчера во перидот помеѓу 14 и 15 часот во атарот на селото и беснеел неколку часа.
„Огнот зафати поголема површина со сува трева и грмушки и беснеше околу два-три часа. На терен интервенираше екипа на ТППЕ Струмица со едно навално возило-цистерна и едно теренско возило, а во гаснењето активно се вклучи и месното население со лопати, канистри со вода и земјоделски прскалки“,
се наведува во објавата на пожарникарите.
Пожарот бил успешно локализиран, а во гаснењето помогнал и дождот кој вчера попладне го зафати струмичкиот регион.
Додека траела битката со огнената стихија во Иловица, околу 17:30 часот пожар избувнал во погон за обработка на картон во селото Колешино.
Таму интервенирале 14 пожарникари со пет противпожарни возила, кои со брза и координирана интервенција успеале да го стават пожарот под контрола и успешно да го локализираат.
Како што информираа од ТППЕ Струмица, на местото било оставено дежурно противпожарно возило со пожарникари од тимот за спасување.
„Останува отворено прашањето: до кога ќе има неодговорни поединци кои со намерно предизвикување пожари го загрозуваат имотот, природата и, пред сè, човечките животи? Пожарот можеби е изгаснат, но опасноста од човечката неодговорност останува“,
се вели во објавата на струмичките пожарникари во врска со двата пожари.