По него во декември 2024 година беше распишана меѓународна потерница. Тој заедно со поранешниот прв вицепремиер и висок ексфункционер на Демократската унија за интеграција (ДУИ), Артан Груби, се меѓу главните осомничени за злоупотреби во Државна лотарија, тешки 8,2 милиони евра
Засега од Министерството за внатрешни работи (МВР) не се објавени официјални информации околу приведувањето на Бајрами
Поранешниот директор на Државна лотарија, Перпарим Бајрами, кој речиси две години беше во бегство, утрово самиот се предаде на органите на прогонот, по што е лишен од слобода, објави МИА.
Според објавите на дел од медиумите, Бајрами, кој е првоосомничен за проневера и злоупотреба на службената положба во случајот „Државна лотарија“, утрово самиот се пријавил кај надлежните органи.
По него во декември 2024 година беше распишана меѓународна потерница. Тој заедно со поранешниот прв вицепремиер и висок ексфункционер на Демократската унија за интеграција (ДУИ), Артан Груби, се меѓу главните осомничени за злоупотреби во Државна лотарија, тешки 8,2 милиони евра.
За потсетување, на 23 февруари годинава, поранешниот прв вицепремиер и министер Артан Груби, кој повеќе од една година беше во бегство, се појави на косовско-македонската граница при влез во земјава, по што веднаш беше приведен.
Судот донесе решение да му се суди во отсуство
Покрај Груби и Бајрами во случајот „Државна лотарија“ се обвинети и поранешниот генерален секретар на Владата, Методија Димовски, како и Скендер Мехмети, Бојан Јанев, Фатмир Рамадановски, Александар Димитриоски и Башким Авдиу, како членови на Надзорниот одбор на Државна лотарија во времето кога според скопското Основно јавно обвинителство се случиле залоупотребите за кои ги товари.
На почетокот на судењето сите обвинети се изјаснија дека не се чувствуваат виновни, освен Бајрами, кој беше во бегство. На предлог на Обвинителството, судот донесе решение нему да му се суди во отсуство, а ќе го застапува адвокат што го ангажирала неговата сестра, Вјолца Бајрами.
За што се товарат
На последното рочиште јавните обвинители го читаа обвинителниот предлог, наведувајќи за што точно се товарат Бајрами, Груби и останатите шестмина обвинети.
Тие се товарат за злоупотреба на службената положба и овластување, во врска со противзаконска набавка на видеолотариски темринали за приредување електронски игри на среќа.
Според обвинението, обвинетите во текот на 2023 и 2024 година ги пречекориле границите на своите службени овластувања, иако знаеле дека АД Државна лотарија нема право самостојно да приредува електронски игри на среќа на видеолотариски терминали.
Новина во обвинителниот предлог е што Обвинителството направи негово допрецизирање, што произлегло од вештачењето, и според кое, наместо за штета од 507 623 173 денари или 8,2 милиони евра, обвинетите сега се товарат за штета од околу 9,7 милиони евра или 596 125 511 денари.
Истрагата за проневерите во Државна лотарија започна во декември 2024 година. Тогаш обвинителството соопшти дека тие се сомничат за кривично дело проневера во службата. Меѓутоа, со поднесувањето на обвинителниот предлог, Обвинителството ја промени квалификацијата во злоупотреба на службената положба и овластувања.