Според него, добрата страна е што кинетиката, движењето и контракцијата на срцевиот мускул е во ред, меѓутоа сѐ уште е во животна опасност
Тринаесетгодишникот што пред три дена беше прободен во срцето со нож при тепачка во скопката населба Чаир е во стабилна, но сè уште во животозагрозувачка состојба. Ова денеска го кажа министерот за здравство Сашо Клековски повикувајќи се на последната информација што ја има, а која е од вчера.
„Последната информација, за жал, ми е од вчера. Стабилна, но животозагрозувачка состојба, сѐ уште“,
рече тој одговарајќи на новинарско прашање.
Според него, добрата страна е што кинетиката, движењето и контракцијата на срцевиот мускул е во ред, меѓутоа сѐ уште е во животна опасност.
За инцидентот на 1 септември информираа од Министертвото за внатрешни работи, од каде што рекоа дека во врска со случајот се приведени петмина.
Со опис на случајот излегоа и од Основното јавно обвинителство (ОЈО) Скопје, од каде рекоа дека 19-годишник е осомничен дека сторил кривично дело насилство. Тој со својот малолетен брат, кој е под законската граница за кривична одговорност, презеле дејствија на насилство со кои на едно дете и на едно полнолетно лице им нанеле тешки телесни повреди со убоди од нож. Во инцидентот полесно беше повредено уште едно дете.
Откако Обвинителството предложи, скопскиот Основен кривичен суд му одреди притвор од 30 дена на 19-годишниот осомничен.
Мерката притвор е определена поради постоење опасност од бегство, можност да ја попречи истрагата со влијание врз сведоци и околности што укажуваат на опасност од повторување на кривичното дело.