ЦУК: И понатаму гори кај селото Церово – активни се уште осум пожари, два се под контрола, а 16 се изгаснати

Екипи на Територијалната противпожарна единица (ТППЕ) Тетово, во координација со Центарот за управување со кризи (ЦУК), вчера интензивно работат на локализирање и ставање под контрола на пожарот околу селото Церово во Општина Желино

Во изминатото деноноќие, заклучно со 7:30 часот утрово, во земјава се регистрирани вкупно 27 пожари, од кои девет се и понатаму активни, два се под контрола, додека 16 се целосно изгаснати, информираат од Центарот за управување со кризи (ЦУК).

Според информациите, сè уште е активни пожарите на територијата на Општина Студеничани на потегот меѓу селата Моране, Вртекица и Рамни Габер, каде гори мешана шума, потоа кај местото Видуш и селата Драгов Дол и Локвица во Општина Македонски Брод, каде е зафетан ниска вегетација, нискостеблеста шума и грмушки, а високостебелста букова шума гори кај месноста Дарда, во атарот на селото Тајмиште на територијата на Општина Кичево.

Активни се и огнените стихии во Општина Липково, кај селото Никуштак, во Општина Крушево кај селото Белушино кој е реактивиран, со крак кон селото Јакренево, потоа кај селото Ломница во Општина Врапчиште, кај селото Бродец на територијата на Општина Тетово, во прилепското село Бонче, како и пожарот кај селото Церово во Општина Желино, каде гори ниска вегетација и папрат.

Екипи на Територијалната противпожарна единица (ТППЕ) Тетово, во координација со Центарот за управување со кризи (ЦУК), вчера интензивно работат на локализирање и ставање под контрола на пожарот околу Церово. Од ЦУК вчера вечер соопштија дека противпожарните екипи дејствуваат со максимален капацитет за да се спречи пожарот да зафати поголема површина.

ЦУК: Пожарот во Церово се следи, сите расположливи екипи се ангажирани на терен

Како што информираат од ЦУК во утринскиот извештај, под контрола е пожарот во депонијата во Делчево, како и огнената стихија во атарот на прилепското село Чаниште, чии краци се движеа кона селата Крушевица, Лопатица, Дуње и кон Црна Река.

Изгаснати се пожарите кои во изминатите 24 часа биле регистрирани во општините Гостивар, Могила, Кавадарци, Ресен, Валандово, Кичево, Куманово, Прилеп, Тетово, Маврово и Ростуше, Свети Николе и на територијата на Општина Охрид.

На повеќе локации во овие општини, според ЦУК, горела ниска вегетација, ѓубре и депонии.