На прашањето што доколку законите останат блокирани во Собранието, министерката рече оти не го оспорува правото на учење на мајчин јазик, принципот на гласање со Бадентерово мнозинство, како и други права на заедниците во државата, но смета дека кога политиката навлегува во образованието штетата е за сите
Министерката за образование и наука Весна Јаневска денеска порача политиката да ги држи рацете подалеку од образованието, оценувајќи дека донесувањето на пакетот закони за високото образование, кои се заглавени во Собранието, е важно за подигнувањето на квалитетот на образованието на универзитетите, а со тоа и подобрување на позициите на високообразовните установи во земјава на меѓународните ранг-лист.
Ваквиот став министерката го изнесе одговарајќи на новинарско прашање околу тоа што ниту еден македонски универзитет не се најде на најновата Шангајска листа и дали законските решенија можат да придонесат за подобро рангирање. Во однос на рангирањето, Јаневска рече дека не очекувала драстични промени во краток временски период од две години, додека за трите закони поврзани со високото образование рече оти очекува откако ќе бидат донесени во Собранието, да го поткренат неговиот квалитет.
„Не очекувавме во период од две години, особено без новите закони, да има некакво драстично придвижување на Шангајската листа. Трите закони кои во моментов се во собраниска процедура очекуваме во еден догледен период значајно да го поткренат квалитетот во високото образование, но и да ги отворат другите индикатори што ги користат не само Шангајската, туку и останатите листи за рангирање, за да можеме да се придвижиме на тие листи“,
изјави Јаневска, која денеска беше во посета на ООУ „Александар Македонски“ во скопската општина Аеродром.
На прашањето што доколку законите останат блокирани во Собранието, министерката нагласи дека образованието не смее да биде поле за политички пресметки.
Одговарајќи на прашањето таа даде мал вовед, во кој рече оти не го оспорува правото на учење на мајчин јазик, принципот на гласање со Бадентерово мнозинство, како и други права на заедниците во државата, но смета дека кога политиката навлегува во образованието, штетата е за сите.
„Несоодвените информации пласирани од поединци или политички субјекти кои служат за придобивање гласови или лајкови во сопствените партиски редови всушност прават штета на сите во државата затоа што на тој начин освен што прават штета на ‘своите’, под наводници, оти сите се ‘наши’, прават штета на сите затоа што оневозможуваат квалитетно образование во земјата“,
изјави Јаневска.
Таа додаде оти младите во земјава заслужуваат квалитетно образование, и дека за законите ќе се соочат со оние што се против нив во парламентот. Досега, рече таа, дискусии за предложените законски решенија имале со академската заедница, додека од политичките субјекти, како што кажа, не добиле никакви сугестии.
„Но, парламентот е место каде ќе се соочиме, доколку сакаат на секој член поединечно и таму ќе го решаваме проблемот доколку воопшто постои, односно ако не станува збор само за политика во образованието. Многу пати сум кажала и повторувам, рацете на политиката подалеку од образованието. Образованието треба да е достапно за сите рамноправно и со донесувањето на овие закони ќе го кренеме квалитетот и во високото образование, што е директно поврзано и со меѓународните рангирања на универзитетите“,
рече министерката за образование и наука.
Инаку, пакетот содржи три законски решенија – нов предлог-закон за високото образование, предлог-закон за обезбедување квалитет во високото образование и наука и предлог-закон за научноистражувачка дејност.
Предлог-законот за високото образование, што треба да го замени актуелното законско решение, донесено во 2018 година, Јаневска го претстави на 6 февруари годинава. Дел од тогаш објавените новини предизвикаа реакции меѓу академската фела, но и од политичките партии од опозицијата, од кои дел бараа повлекување на новиот закон. Сепак, предложеното решение помина на владина седница, а според веб-страницата на парламентот, овој заедно со останатите два закони е во собраниска процедура од 17 јули.
Она што е извесно е дека барем една пратеничка група, онаа на ДУИ, ќе се изјасни против новиот закон за високо образование. Од партијата за „360 степени“ во јуни рекоа дека се загрижени оти со предложените решенија може да се намали степенот на автономија на универзитетите и да се зголеми влијанието на централната власт врз нивното функционирање.