Според СДСМ, реакцијата на власта во услови на криза го покажува нивниот однос кон граѓаните – присутни се кога треба да се сечат ленти, но исчезнуваат кога има реални проблеми што ги погодуваат обичните луѓе
Пет недели труење во Гостивар, а Мицкоски ниту еднаш не отиде. Вака денеска Социјалдемократскиот сојуз на Македонија (СДСМ) го критикува премиерот обвинувајќи го за игнорирање на кризата со водата за пиење во Гостивар, која трае веќе пет недели.
Од партијата истакнуваат дека граѓаните на Гостивар се соочуваат со сериозен проблем со водоснабдувањето, поради што се принудени да чекаат во редици за флаширана вода.
„Водата не е безбедна за пиење. Луѓето стојат во редици за пластични шишиња. Деца, стари, болни – сите се соочуваат со основен проблем: чиста вода“,
се наведува во соопштението од СДСМ.
Според нив, со проблеми се соочува и гостиварската болница, каде има епидемија на жолтица.
„Отруена е и болницата, пациентите се префрлени во друг град. Има епидемија на жолтица, нема лекари и медицински техничари“,
реагираат од СДСМ.
Опозициската партија потенцира дека во текот на целиот овој период од пет недели, премиерот Мицкоски ниту еднаш не го посетил Гостивар за да ги види проблемите на терен, туку, наместо тоа, заминал на годишен одмор.
„Единственото што го направи во овој период беше да го нарече сопствениот народ ’талог’ и да продолжи со кампања на поделби и сеење омраза – по методите на Ванчо Михајлов и Александар Вучиќ“,
се додава во соопштението.
Според СДСМ, реакцијата на власта во услови на криза го покажува нивниот однос кон граѓаните – присутни се кога треба да се сечат ленти, но исчезнуваат кога има реални проблеми што ги погодуваат обичните луѓе.
Инаку, вчера од Локалниот кризен штаб информираа дека квалитетот на водата во гостиварскиот водовод е речиси безбедна за користење и пиење и дека одлуката за целосно повлекување на забраната за пиење треба да ја донесе Централниот кризен штаб по завршувањето на последните испитувања.
Во врска со загадувањето на водата во Гостивар, СДСМ во понеделникот поднесе кривична пријава против министерот за здравство Сашо Клековски и директорите на повеќе здравствени институции. Тие ги обвинија за пропусти и непреземање мерки при загадувањето на водата за пиење во Гостивар.