Првичните проценки на судскиот патолог на самото место индицираат дека најверојатно станува збор за машко тело кое било брутално распарчено пред да биде сокриено во патната торба
Сцени налик на филмско криминално трилер-сценарио се одвивале денеска попладне во атинската населба Кипсели, откако во напуштена зграда бил пронајден куфер со распаднати човечки останки. Грчката полиција веднаш прогласи вонредна состојба во реонот по пријавата за грозоморното откритие.
Според официјалните информации објавени во грчките медиуми, куферот бил лоциран околу 14:00 часот во напуштен објект на улицата „Евелпидон“ број 7. Пронаоѓачот е бездомник кој привремено престојувал во зградата. Неговото внимание го привлекла неподнослива и исклучително силна миризба на распаѓање која се ширела од еден од аглите на просторијата.
Грчките медиуми, повикувајќи се на полициски извори, пренесуваат шокантен детал дека во моментот кога бездомникот го доближил куферот, од него веќе делумно се гледало човечко стопало, по што тој во паника веднаш ја алармирал итната полициска служба.
Силни полициски сили, форензичари и вештаци од Дирекцијата за криминалистички истраги веднаш го блокираа целиот кварт околу улицата Евелпидон. Првичните проценки на судскиот патолог на самото место индицираат дека најверојатно станува збор за машко тело кое било брутално распарчено пред да биде сокриено во патната торба.
Во тек е детална проверка на сите пријавени исчезнати лица во поширокиот регион на Атика во изминатиов период, додека се чекаат целосните обдукциски и ДНК анализи кои треба да го утврдат идентитетот на жртвата и точната причина за смртта.