Филмската проекција и музичко-поетскиот перформанс се на програмата денеска, додека камерниот концерт „Неочекувани поврзувања: Класичната музика и светот на тангото“ е на утрешната програма
Целата програма на Скопско лето може да ја погледнете ОВДЕ
Вечерва, со почеток од 20:15 минути, во Кинотека на Македонија ќе биде прикажан филмот „Хај Фај“ (1987 година) во режија на Владимир Блажевски, а по текст на истоимената драма на Горан Стефановски.
Речиси во исто време, во 20:30 часот, но во Музејот на Град Скопје, ќе се одржи мултимедијалниот музичко-поетски перформанс „Културна кауза“. Станува збор за проект на домашниот музичар и продуцент Никола Стојковски (ФИН Проект) и негови соработници.
Утре, во недела 12 јули, ќе се одржи камерниот концерт „Неочекувани поврзувања: Класичната музика и светот на тангото“. Настанот првично беше најаван дека ќе се одржи во Сули ан, но на Фејсбук страницата на Скопско лето вчера соопштија дека поради најавите за можно невреме, концертот се префрла на затворено – во Музејот на македонска борба со почеток од 20:30 часот.
Го организира ФЕЈМС Институтот. Концертот е дел од јулската концертна серија на институтот, а ќе го води виолинистот Веско Ешкенази, концертмајстор на Кралскиот оркестар Концертгебау во Амстердам, и бандонеонистот Стојан Караиванов, првиот бугарски музичар кој свири на класичен аргентински бандонеонски систем. На сцената ќе настапи и пијанистката Викторија Бојанова. Програмата опфаќа дела од Моцарт и Менделсон, како и композиции од Астор Пјацола. Преку спојот на класичната музика, тангото и филмската музика се истражуваат врските меѓу традицијата и современиот музички израз.
Концертот претставува завршен настан на шестдневната едукативна програма на ФЕЈМС Институтот, во чија рамка млади професионални музичари од повеќе европски земји, под менторство на Ешкенази и Караиванов, работат на избраниот репертоар и стекнуваат практично искуство за настап на професионална сцена