Претседателот на бугарскиот Евроатлантски центар за безбедност, во изјава за БГНЕС, вели дека политичарите од Бугарија и Северна Македонија треба да ги надминат несогласувањата, да бидат обединети и да соработуваат
Политичарите кои сакаат да профитираат од постојаните провокации меѓу Бугарија и Северна Македонија можеби ќе имаат краткотрајна добивка, но долгорочно немаат визија и му штетат на добрососедството и пријателството меѓу двете земји, смета Цветан Цветанов, претседател на бугарскиот Евроатлантски центар за безбедност.
Цветанов, во изјава за БГНЕС, вели дека политичарите од Бугарија и Северна Македонија треба да ги надминат несогласувањата, да бидат обединети и да соработуваат, бидејќи како што наведува, денес светот е многу поразличен отколку што беше пред неколку децении.
Тој истакна дека државите од Западен Балкан се стремат да бидат дел од силна и обединета Европа без граници и ограничувања, но предупредува и дека постојат многу земји кои не сакаат Северна Македонија да биде дел од ЕУ и полноправна членка на НАТО.
„Ние сакаме да и помогнеме на Северна Македонија и тука мора да му се оддаде признание на бугарското претседателство со ЕУ, кое ја држеше на агендата темата за Северна Македонија“,
вели Цветанов.
Сепак, според него, Софија заостанува во односите со Скопје, дури и зад Атина, која по решавањето на спорот за името гради добри релации со северниот сосед.
„Проблемот е сериозен затоа што Грција која беше многу порезервирана кон Северна Македонија денес има многу подобра основа за градење партнерство со неа, додека Бугарија малку заостанува“,
рече Цветанов.
Неопходно е, вели тој, да се работи на интензивирање на соработката, што ќе ја зацврсти економијата, безбедноста и стабилноста на целиот регион. Таков проект за развој на регионот, како што посочува, е „Триморие“ во кој се вклучени осум земји меѓу Балтичкото, Црното и Јадранското Море.