Запрашан за причините за неговото отсуство на отчетот што го дадоа неговите партиски лидери од Влен, министерот кратко појасни дека имал други неодложни обврски поради кои бил оневозможен да присуствува на настанот
Министерот за економија и труд, Бесар Дурмиши, денеска не даде прецизен одговор на прашањето дали ќе биде опфатен со најавената владина реконструкција. Деталите за кадровските измени во извршната власт се очекува да бидат познати вечерва, по завршувањето на седницата на Извршниот комитет на ВМРО-ДПМНЕ.
На прес-конференцијата во Владата, каде што презентираше отчет за сработеното во изминатите две години, Дурмиши истакна дека функциите и именувањата не се долгорочни, туку краткорочни, и дека фокусот треба да биде ставен на резултатите во интерес на граѓаните.
„На избори излегуваме пред граѓаните и кажуваме што ќе направиме, а кога ќе ја добиеме поддршката, претседателите на партиите и коалиционите партнери разговараат кои се подобри луѓе за да раководат со ресорите. Подобро се чувствувам да завршам некоја работа која е од интерес за граѓаните отколку колку време ќе бидам во ресорното Министерство“,
изјави Дурмиши.
Тој додаде дека во изминатиот двегодишен мандат неговиот ресор направил многу за граѓаните, стопанството и државата, најавувајќи дека работата ќе продолжи со иста динамика. Одлуката за тоа кои министри ќе бидат разрешени или дали ќе има ротација на ресорите, според него, останува на лидерите на коалициските партнери.
Запрашан за причините за неговото отсуство на отчетот што го дадоа неговите партиски лидери од Влен, министерот кратко појасни дека имал други неодложни обврски поради кои бил оневозможен да присуствува на настанот.
Инаку, премиерот Христијан Мицкоски најави дека денеска по завршување на седницата на Извршниот комитет на ВМРО-ДПМНЕ ќе бидат познати кадровските решенија и имињата на новите министри во Владата.