Јужниот сосед ги очекува одлуките на европско ниво, односно што ќе решат членките на Унијата за потоа да ја соопшти и грчката позиција
Грција утре и официјално ќе отвори дел од граничните премини со Северна Македонија, Албанија, Бугарија и Турција, но во текот на денешниот ден ќе се знае дали тоа ќе значи и дозвола за влез кај јужниот сосед за македонски, албански и турски државјани, со оглед на тоа дека се од трети земји, надвор од ЕУ, јави МИА од Атина.
Јужниот сосед ги очекува одлуките на европско ниво, односно што ќе решат членките на Унијата за потоа да ја соопшти и грчката позиција.
Во однос на тоа што ќе важи за авионското, морското и копненото поврзување од и кон Грција со земјите што не се во ЕУ, грчки владини извори синоќа брифираа дека листата на трети земји за кои Грција ќе дозволи влез ќе биде финализирана денеска, откако за конкретното прашање ќе завршат консултациите на ниво на Европската унија.
Портпаролот на грчката влада Стелиос Пецас на вчерашниот брифинг со новинари објасни дека ги очекуваат одлуките од ЕУ и рече дека станува збор за тешка дискусија и потребно е да се согласат сите земји, но истакна дека доколку не се постигне договор на европско ниво, Грција ќе ја соопшти својата позиција.
Медиумите во Грција, во изминатите денови, повикувајќи се на извори од ЕУ, пишуваа дека за одреден број трети земји ќе се продолжи забраната за летови кон земјите од Унијата. Меѓу државите за кои ќе важи забраната се споменуваше и Северна Македонија.
Грција утре отвора 27 регионални аеродроми за меѓународни летови, седум копнени гранични премини и седум пристаништа за влез во земјата. Од граничните премини ќе се отворат еден со Северна Македонија („Евзони“) и по два со Албанија, Бугарија и Турција.