„Овие две фирми имаат подолга историја на работење во Македонија со проектирање и надзор, но никогаш претходно во вака структурирана шема поврзана со парите од унгарскиот кредит и омилените изведувачи на ВМРО-ОКГ“, вели Фрчкоски
Тој вели дека пресметано во проценти, од 2024 година имаат раст од 288,65 отсто
Антикорупцискиот тим на Социјалдемократскиот сојуз на Македонија (СДСМ) денеска обвини дека фирмите тендераши на власта си имаат свои омилени две компании што ги ангажираат.
Јон Фрчкоски, член на Извршниот одбор на СДСМ, на денешната прес-конференција рече дека во десетици општини и институции низ државата се повторува ист образец – истите изведувачи добиваат милионски тендери, а над нив работат само две фирми – „МГ проект“ и „МБМ архитекти“.
Фрчкоски пред новинарите покажа документи со кои ги поврзува овие две фирми со „Ленди груп“, „Пирамид билдинг солушнс“ и „Мастеф“.
Според него, во Општина Кисела Вода, каде што беше градоначалник Орце Ѓорѓиевски, изведувач на градежни работи е фирмата „Ленди груп“, а за стручен надзор е избрана „МГ проект“. Договорот, како што рече, е за реконструкција на улици, партерно уредување на салата „Расадник“ и други проекти.
Во Општина Илинден, за која Фрчкоски вели дека е апсолутен рекордер со 100 микродоговори, изведувач е исто така „Ленди груп“, а за надзор е фирмата „МГ проект“.
Фрчкоски вели дека во Општина Аеродром омилена фирма е „Пирамид билдинг“, а главен договор за надзор има фирмата „МБМ архитекти“. Истите две фирми се и во Општина Гази Баба, каде „МБМ архитекти“ имала два договори – еден за надзор над изградба на објекти и еден за надор над патна инфраструктура.
Според Фрчкоски, истото важи и за „Мастеф“, за која вели дека е компанија за урбана опрема и игралишта што работи исклучиво под надзор на „МБМ архитекти“ и „МГ проект“, а е ангажирана од Општините Кисела Вода, Аеродром, Брвеница, Неготино, како и од Министерството за спорт.
„Овие две фирми имаат подолга историја на работење во Македонија со проектирање и надзор, но никогаш претходно во вака структурирана шема поврзана со парите од унгарскиот кредит и омилените изведувачи на ВМРО-ОКГ“,
рече Фрчкоски.
Тој вели дека ова го потврдуваат и бројките за профитот и склучените договори само во изминатите две години, во кои се реализира унгарскиот заем.
За фирмата „МГ проект“ Фрчкоски вели дека во овој период успева да склучи договори со вкупна вредност од 2,4 милиони евра, а „МБМ архитекти“ договори вредни 2,9 милиони евра.
„Во проценти, ако пресметаме, од 2024 година имаат раст од неверојатни 288,65 отсто“,
додаде Фрчкоски.
Вели дека не е случајно што едни исти фирми добиваат тендери и едни исти омилени фирми вршат надзор и проектирање.
„Сè е бизнис-шема за Мицкоски и ВМРО-ОКГ, буквално сè“,
рече тој.
Според него, власта нема пари за плати и за земјоделците, а има за тендери и бизнис-шеми.
„А кога ќе снема пари и за тендери, е тогаш ќе сакаат предвремени избори“,
кажа Фрчкоски.
Тој праша до кога Обвинителството ќе молчи и нема да презема ништо и најави дека СДСМ ќе ги испита сите постапки и одговорност, од прв до последен.