Од администрацијата на Општина Аеродром велат дека советничката група на СДСМ манипулира и со цената, односно дека градежното земјиште ќе се продава за 2 000 денари по метар квадратен и велат дека не станува збор за продажна цена, туку за почетна цена утврдена согласно закон, додека конечната цена ќе биде формирана на електронско јавно наддавање
Во реакцијата од Министерството за транспорт се вели дека постапката ја води општина Аеродром согласно сите законски процедури, а од нив било побарано само мислење
Општина Аеродром попладнево преку писмена реакција ги отфрли обвинувањата на советничката група на опозицискиот СДСМ дека Општината за „багателна“ цена од 2 000 денари квадратен метар распродава градежно земјиште, оценувајќи ги како политичките конструкции, манипулации и целосно неточните тврдења.
Според општинската администрација, станува збор за уште еден обид за евтина политичка кампања преку свесно ширење дезинформации и без елементарно познавање на материјалите што редовно се разгледуваат на седниците на Советот.
„Доколку советниците од СДСМ навистина ги следеа точките за кои земаат советнички паушал, ќе знаеја дека не постои никаква ‘распродажба’, туку јасно дефинирана законска постапка за развој на општината“,
велат од Општина Аердром
Дека станува збор за манипулација и недоследност во ставовите на опозициската партија, според Општина Аеродром, говори и тоа што на четвртата седница на Советот на Општината Аеродром, одржана на 26.12.2025 година, при разгледување на 24. точка – Предлог-програма за работа во областа на располагањето со градежното земјиште во сопственост на Република Македонија на подрачјето на Општина Аеродром за 2026 година, немало никакви спротивставени мислења на политиките кои денес се предмет на критика.
За точката од дневниот ред, се вели во соопштението од Општината, тогаш „за“ гласале 16 советници, а „против“ и „воздржани“ немало.
„Овој официјален запис од седницата јасно покажува дека не станува збор за принципиелен став, туку за политичка неконзистентност и обид за дневнополитичка манипулација. Дополнително, СДСМ во минатото имаше сопствени планови за истиот простор, за кој јавно беше најавуван проект за ‘Дом на спортови и Олимписки дом’, со содржини од голем обем и комерцијално-деловен карактер. Дали тогаш интересот беше различен, па со договорен партнер сакаа да изградат огромна деловна зграда?“,
велат од Општината.
На конкретната локација, додаваат оттаму, се предвидува реализација на проект од јавен интерес кој, како што велат, носи нови спортски и рекреативни содржини, уреден јавен простор и значително подобрување на квалитетот на живот за граѓаните.
Дополнително, оттаму наведуваат дека советничката група на СДСМ манипулира и со цената, односно дека градежното земјиште ќе се продава за 2 000 денари по квадратен метар. Од Општина Аеродром велат дека не станува збор за продажна цена, туку почетна цена утврдена согласно закон.
„Конечната цена ќе се формира единствено преку транспарентно електронско јавно наддавање, во целосно отворена и конкурентна постапка, каде секој заинтересиран субјект има еднаков пристап. Затоа, обидите ова да се прикаже како ‘распродажба’ се или резултат на незнаење или свесна политичка манипулација. Дополнително, крајно лицемерно е токму советничката група на СДСМ да зборува за заштита на јавниот интерес и урбан ред. Граѓаните на Аеродром многу добро паметат кој со години ги бетонираше тревниците, кој дозволуваше хаотична урбанизација и кој ја претвори општината во простор со нарушен квалитет на живеење. Просторот кај Мајчин дом останува симбол на таквите погрешни урбанистички политики, чии последици граѓаните ги чувствуваат и денес“,
се вели во реакцијата од Општина Аеродром.
Таа доаѓа откако претходно денеска членот на ОО на СДСМ во Аеродром и советник во Општината, Марко Даниловски, на прес-конференција објави сознанија дека Општина Аеродром продава градежно земјиште по, како што велат од партијата, багателна цена од 2 000 денари за квадратен метар и праша дали зад ваквата зделка стојат министрите за транспрот и за спорт Александар Николоски и Борко Ристоски, а задолжен за спроведување на проектот е градоначалникот на општината, Дејан Митевски.
Како што посочи Даниловски станува збор за градежно земјиште со површина од 23 000 квадратни метри, кое се наоѓа на атрактивна локација, непосредно до хотел „Русија“ и Спортскиот центар „Јане Сандански“.Според него, ваквиот случај отвора цела низа прашања и потпрашања поврзани со намерите кои се кријат зад продажбата на земјиштето, а едно од нив, кое го наведе, е за кого е наменето ова земјиште.
На прес-конференцијата реагираа и од Министерството за транспрот, од каде што рекоа дека станува збор за лаги и измислици бидејќи, како што наведуваат, постапката ја води општина Аеродром согласно сите законски процедури, а од ресорното Министерство е побарано мислење.
„Министерството даде позитивно мислење затоа што сите законски процедури се испочитувани. Со оглед на тоа дека намената е спорт Министерството за транспорт даде позитивно мислење. Развојот на спортската инфраструктура е приоритет и ние силно ја поддржуваме. Општина Аеродром ја има нашата цела поддршка. Целата постапка од страна на општината е целосно транспарентна и согласно сите регулативи“,
велат од Министерството за транспрот.