Претседателот на Социјалдемократскиот сојуз на Македонија во изјава за медиумите ги повика сите политички партии, граѓански организации, активисти, интелектуалци, млади, студенти да се приклучат на иницијативата, чија цел е, како што кажа, да се спротивстави на актуелната власта и нејзините штетни политики
Лидерот на опозицискиот Социјалдемократски сојуз на Македонија (СДСМ), Венко Филипче, денеска соопшти дека коалицијата предводена од партијата со која раководи ќе продолжи да дејствува во, како што рече, една нова форма – „Фронт за слобода и правда“. Филипче ова го кажа во изјава за медиумите пред почетокот на денешниот изборен конгрес на коалицискиот партнер НСДП, заблагодарувајќи се за поддршката што во рамките на коалицијата ја дава оваа партија.
„Денес сме тука на покана на претседателот на НСДП, Горан Мисовски, се одржува изборниот конгрес на партијата. Јас им честитам за целата досегашна работа и им благодарам за коалициската поддршка што ја даваат долги години наназад, а тоа е доказ дека навистина споделуваме идентични, би рекол, вредносни политики. Коалицијата и соработката продолжува и понатаму, сега во една нова форма – ‘Фронтот за слобода и правда’“,
рече лидерот на СДСМ.
Тој ги повика сите политички партии, граѓански организации, активисти, интелектуалци, млади, студенти да се приклучат на иницијативата, чија цел е, како што кажа, да се спротивстави на актуелната власта и нејзините штетни политики.
Да се приклучат кон „Фронтот за слобода и правда“, Филипче ги повика и политичките партии кои се дел од актуелната владејачка коалиција бидејќи, рече, занат дека оваа власт не ја води државата како што треба.
„Ги повикуваме заеднички во фронтот да се бориме против оваа криминална власт која го пљачка и последниот денар од буџетот, додека тие уживаат и се богатат на сметка на граѓаните. Против оваа криминална власт која ја држи земјата во изолација, а тие сите имаат бугарски пасоши во џебовите, и против оваа криминална власт којашто одработува за туѓи интереси, пред сè српски и руски, сакајќи да останеме изолирани и ‘слепо црево’ на Балканот“,
рече Филипче.
Ваквите политики на власта, порача тој, нема да ѝ поминат на актуелната владејачка гарнитура и Македонија повторно ќе биде на исправниот пат кон Европската Унија, повторно ќе биде демократска и слободна, и повторно младите во неа ќе ја гледаат својата иднина.
„Крајната цел ќе биде оваа криминална власта да замине, да ја ослободиме држава, да се вратиме на европскиот пат, а бандата предводена од Христијан Мицкоски да одговара и да враќа пари“,
рече претседателот на Социјалдемократскиот сојуз.
Тој се осврна и на барањето на СДСМ за референдум на кој граѓаните би се изјасниле околу европските интеграции, кој, како што кажа, власта има обврска да го распише затоа што нема право да го запира европскиот пат на државата.
„Затоа што излажаа дека ќе обезбедат подобра преговарачка позиција и никогаш не кажаа дека ќе го бликираат европскиот пат на земјата, затоа што излажаа дека ќе го вратат името, дека ќе го укинат Преспанскиот договор, Договорот за добрососедство (со Бугарија) и ништо од тоа не направија. Дојдоа на власт со една голема лага со една пропаганда којашто е финансирана, стимулирана и поддржана од други земји и затоа што оваа власт одработува за други земји, тие тоа право го немаат. Овој ‘Фронт’ има за цел во очи следните избори, без разлика кога се, дали се предвремени или редовни, да ја врати власта во рацете на граѓаните“,
изјави Филипче.