Цистерни на Војската на Србија со вода за пиење се поставени во општата болница во Чачак и на улиците на тој град и на Горњи Милановац, соопшти Министерството, каде што доставуваат вода до локалното население според распоредот на локалните комунални претпријатија
Дефект на регионалниот водоводен систем „Рзав“, кој се случи во градот Горобиље, каде што пукна главната цевка, остави околу 250 илјади граѓани на Пожега, Чачак, Лучан и Горњи Милановац без вода два дена.
Како што потврдуваат од ЈКП „Рзав“, станува збор за сериозен дефект на бетонска цевка со голем дијаметар, но екипите веднаш излегле на терен и веќе работат напорно на трајно решавање на проблемот, со цел што поскоро нормализирање на водоснабдувањето.
Врз основа на одлуката на претседателот на Општина Горњи Милановац, на територијата на општината е прогласена вонредна состојба поради опасност од недостиг на вода за пиење.
Од попладнево, како што пренесуваат српските медиуми, армијата е ангажирана за обезбедување вода за пиење на жителите на Чачак и Горњи Милановац.
Цистерни на Војската на Србија со вода за пиење се поставени во општата болница во Чачак и на улиците на тој град и на Горњи Милановац, соопшти Министерството, каде што доставуваат вода до локалното население според распоредот на локалните комунални претпријатија.
Локалните медиуми јавуваат дека ситуацијата е алармантна и речиси е невозможно и да се купи вода во маркетите.
Најзагрозен е Чачак каде што болницата веќе го има променето режимот на работа, а најголем дел од операциите се откажани.
Слична е ситуацијата и со другите институции.
Од водоводот велат дека сè би можело да се врати во нормала во следните неколку дена.
Локалните власти апелираат до населението да не ја користат водата од водоводниот систем „Рзав“ за пиење во следните десет дена, односно додека не се укине вонредната состојба.