Возачите што ја користат опцијата М-кард од средината на идниот месец ќе мора да ја реализираат наплатата на другите достапни ленти на наплатните станици, во согласност со нивната намена
Јавното претпријатие за државни патишта (ЈПДП) информира за воведување оперативни измени во функционирањето на системот за наплата на патарините. Почнувајќи од 15 јуни, лентите означени за М-таг ќе бидат наменети исклучиво за корисници со електронски тагови, со што на овие ленти целосно се укинува вршењето наплата со картички М-кард.
Возачите што ја користат опцијата М-кард од средината на идниот месец ќе мора да ја реализираат наплатата на другите достапни ленти на наплатните станици, во согласност со нивната намена.
Од ЈПДП упатуваат апел до сите учесници во сообраќајот за строго почитување на вертикалната и хоризонталната сигнализација, како и на информативните електронски табли кои се поставени пред и на самите наплатни станици. На нив е направена јасна категоризација на лентите според видот на плаќање дали е електронска наплата со М-таг или со готовинско плаќање и М-кард.
За сообраќајот да се одвива непречено и безбедно, од Јавното претпријатие потсетуваат дека возачите се должни да го следат електронскиот статус на самите ленти – зелена стрелка означува отворена лента за сообраќај и црвен икс означува затворена лента.
„Непочитувањето на означувањето и намената на лентите може да предизвика застои во сообраќајот, но и да влијае врз безбедноста и ефикасноста на сообраќајот“,
соопштуваат од ЈПДП.