Градоначалникот појасни дека динамиката на реализација зависи од капацитетите и претходно завршените обврски на Градот
Градоначалникот на Скопје, Орце Ѓорѓиевски, идната недела ќе има завршен состанок со министерот за здравство Азир Алиу на кој заеднички ќе објават кога ќе биде спроведена тендерската постапка за монтажните гаражи во Клиничкиот центар „Мајка Тереза“.
Ѓорѓиевски вели дека по завршување на тендерската постапка веднаш ќе се почне со изградба на гаражите.
Градоначалникот појасни дека динамиката на реализација зависи од капацитетите и претходно завршените обврски на Градот.
„Предвидовме средства, направивме ребаланс, но имавме уште неколку постапки што требаше да ги заокружиме – исплатите на Момин Поток каде што трасата е целосно решена, за булеварот ’Борис Трајковски’ влеговме во процес за конечно да заврши голготата на над 100 000 граѓани кон Драчево и почнува поставувањето на атмосферската канализација. Тука се и мостот ’Љубљанска’, ’Генерал Михајло Апостолски’, Луна паркот. Сега се на ред и катните, монтажните гаражи на Клинички“,
рече Ѓорѓиевски.
Министерството за здравство (МЗ) и Град Скопје го потпишаа договорот за изградба на паркинзи во рамките на Клиничкиот центар „Мајка Тереза“ на 7 март годинава. Договорот е на 15 години, со 10 отсто закупнина од вкупно остварениот промет.
Во првата фаза е предвидена изградба на два современи монтажни паркинга, со најмалку 500 паркинг-места, кои се очекува да бидат ставени во функција до втората половина на наредната година. Паркинзите ќе бидат, пред сѐ, наменети за пациентите и за вработените во Клиничкиот центар. Планирано е едниот паркинг да биде кај Клиниката за гинекологија, а вториот кај црквата во Клинички.