Дневниот весник „Кориере дела Сера“ објави дека американските бомбардери требало да слетаат во базата во источна Сицилија пред да го продолжат летот кон Блискиот Исток
Италија одби дозвола за слетување на американски воени авиони во воздухопловната база Сигонела на Сицилија на пат кон Блискиот Исток, потврди извор запознаен со ситуацијата. Ова ги потврдува претходните медиумски извештаи, пренесува Ројтерс.
Дневниот весник „Кориере дела Сера“ објави дека американските бомбардери требало да слетаат во базата во источна Сицилија пред да го продолжат летот кон Блискиот Исток.
Според весникот, дозволата била одбиена бидејќи САД не побарале формално одобрение, ниту се консултирале со италијанското воено раководство, што е потребно според договорите што го регулираат користењето на американските воени објекти во Италија.
Изворот, кој побарал да не биде именуван бидејќи не бил овластен да зборува со медиумите, не го прецизирал бројот на вклучени авиони ниту кога Рим ја одбил дозволата. Од италијанското Министерство за одбрана сè уште нема коментар.
Опозициските партии од левиот центар ја повикаа владата да го блокира користењето на американските бази во Италија за да се избегне влечење на земјата во конфликт. Централно-десничарската влада на премиерката Џорџа Мелони претходно објави дека ќе побара одобрение од парламентот доколку бидат поднесени такви барања.
Шпанија вчера го затвори својот воздушен простор за американски авиони што учествуваат во нападите врз Иран.