Првично, Кувајт предупреди за можно излевање на нафта по нападот, но британскиот поморски монитор вели дека не е пријавено никакво влијание врз животната средина
Кувајтски танкер полн со сурова нафта се запали во близина на Ормускиот Теснец откако бил погоден од ракета, која според властите во Кувајт била истрелана од Иран, пренесуваат светските медиуми.
Како што објави Организацијата за поморски операции на Велика Британија (УКМТО), во инцидентот нема повредени членови на екипажот на бродот, а не е пријавено ниту истекување на нафта што би предизвикало еколошка штета.
Според информациите, танкерот се наоѓал 31 наутичка милја, односно 57,4 километри северозападно од Дубаи во Обединетите Арапски Емирати кога ракетата ја погодила десната страна на бродот.
Инаку, комерцијални бродови се изложени на ракетни, воздушни и поморски напади со беспилотни летала во Персискиот залив и во Ормускиот Теснец откако Соединетите Американски Држави и Израел го нападнаа Иран на 28 февруари, годинава.
Претходно вчера, грчки товарен брод, кој бил закотвен покрај брегот на Саудиска Арабија во близина на Рас Танур пријавил два одделни инциденти во кои ракети паднале во морето во негова близина, пренесуваат светските медиуми, повикувајќи се на експерти за поморска безбедност.
Претставник на бродот „Експрес Рим“, кој пловел под либерско знаме, изјавил дека два неидентификувани проектили паднале во морето на околу 22 наутички милји (40,7 километри) североисточно од Рас Танур.
Според британската фирма за управување со поморски ризици „Вангард“, инцидентите се случиле еден по друг, во интервал од еден час, без да предизвикаат штети на бродот или врз екипажот.
Иранската Исламска револуционерна гарда претходно ја презеде одговорноста за нападот врз „Експрес Рим“ што се случи на 11 март, соопшти „Вангард“, додека за вчерашните инциденти засега никој официјално не ја презел одговорноста.
Во врска со нападот врз танкерот закотвен во близина на Дубаи, кувајтските власти наведоа дека станува збор за „брутален ирански воздушен напад, објавувајќи дека на бродот е предизвикана одредена штета, но оти нема жртви, пренесе Би-би-си.
Танкерот „Ал Салми“ бил целосно натоварен во времето на нападот, што предизвикало пожар на бродот.
Властите во Дубаи соопштија дека во нападот бил вклучен дрон и дека напорите за гаснење на пожарот се во тек.
„Сите 24 членови на екипажот се безбедни и неповредени“,
навеле тие.
Kuwait's giant crude oil tanker Al-Salmi was directly hit by Iranian missiles at Dubai Port UAE https://t.co/brMyYCPzif
— Israel-Iran-war-news (@Israel_Iran_war) March 31, 2026
Првично, Кувајт предупреди за можно излевање на нафта по нападот, но британскиот поморски монитор вели дека не е пријавено никакво влијание врз животната средина.
Новинската агенција Ројтерс објави дека „Ал Салми“ бил натоварен со два милиони барели нафта од Кувајт и Саудиска Арабија, а крајната дестинација му било пристаништето Кингдоа во Кина.
Одделно, кувајтската војска соопшти дека нејзината воздушна одбрана реагирала на непријателски ракетни и напади со беспилотни летала, пренесе кувајтската новинска агенција.