За иницијативата денеска на прес-конференција информира пратеничката на СДСМ и поранешна министерка за култура, Бисера Костадиновска-Стојчевска, која ја обвини актуелната власт предводена од ВМРО-ДПМНЕ за целосна непримена и игнорирање на одредбите од Законот донесен на почетокот на 2024 година
Таа, во името на пратеничката група на СДСМ и коалицијата, ги повика сите пратеници да го поддржат ова барање бидејќи, како што посочи, се работи за заштита на македонскиот јазик
Пратеничката група на опозицискиот Социјалдемократскиот сојуз на Македонија (СДСМ) и коалицијата најави дека денеска ќе поднесе барање за надзорна расправа во врска со примената и имплементацијата на одредбите од Законот за употреба на македонскиот јазик.
За иницијативата денеска на прес-конференција информира пратеничката на СДСМ и поранешна министерка за култура, Бисера Костадиновска-Стојчевска, која ја обвини актуелната власт предводена од ВМРО-ДПМНЕ за целосна непримена и игнорирање на одредбите од Законот донесен на почетокот на 2024 година.
Образложувајќи ги причините за поднесувањето на барањето за надзорна расправа, пратеничката кажа дека македонскиот јазик е признаен од целиот свет и од Европската Унија, но е загрозен од владата на премиерот Христијан Мицкоски.
„Како што ВМРО лажеше дека ќе го врати името, така водеше и лажна кампања дека е загрозен македонскиот јазик. Денеска, македонскиот јазик е признаен од целиот свет и од Европската Унија. Но македонскиот јазик денеска е загрозен од владата на Мицкоски. Не се применува Законот за употреба на македонскиот јазик, Закон кој значи заштита, унапредување, почитување и збогатување на македонскиот јазик“,
рече Костадиновска-Стојчевска.
Таа потсети дека Законот е донесен во јануари 2024 година, со широк консензус од сите пратеничките групи во претходниот собраниски состав, со широка дебата, и со вклучување на предлозите од сите засегнати страни.
Но, наместо негова примена, според опозициската пратеничка, денес има целосно игнорирање на сите одредби од законот.
Како што наведе Костадиновска-Стојчевска, иако има именувана директорка на Инспекторатот за употреба на македонскиот јазик, тој како институција не функционира, а стратегијата за македонскиот јазик е во работна верзија која започнала да се подготвува пред само две недели.
„Не функционира Инспекторатот, нема вработени, нема лектори, не се почитува ниту употребата на македонскиот јазик на јавни настани. А никој не реагира. И кога сакавме да разгледаме како оди имплементацијата на овој закон, сфативме дека нема ништо спроведено. Навистина ништо. Секој буџет од 2024 година наваму и секој ребаланс гледаме кратење на пари. Нема пари за примена на Законот за македонски јазик, ама има за тендери“,
рече пратеничката од редовите на СДСМ.
И кога некој би поднел пријава за какво било непочитување на Законот, по неа, како што наведе ексминистерката за култура, нема кој да постапи.
Таа наведе дека на барање на актуелното владејачко мнозинство се направи промена во Законот со која се намалило институционалното ниво на Инспекторатот, а образложението за ваквата промена е со цел да се овозможи тој да профункционира.
„И повторно не функционира. Затоа, денеска пратеничката група на СДСМ и коалицијата поднесува барање за надзорна расправа за примената и имплементацијата на одредбите од законот за употреба на македонскиот јазик. Ние не клечевме и не молевме за власт, ветувајќи промена на името. Ние ја штитиме Македонија преку НАТО и сакаме Македонија во ЕУ. Тоа се национални интереси и тоа, меѓу другото, е и заштита на македонскиот јазикот. Го поднесуваме ова барање за да се најде решение, и конечно законското решение да почне да функционира“,
рече Костадиновска-Стојчевска.
Таа, во името на пратеничката група на СДСМ и коалицијата, ги повика сите пратеници да го поддржат ова барање бидејќи, како што посочи, се работи за заштита на македонскиот јазик.
Со 96 гласа „за“ Собранието на 26 јануари го усвои Законот за употреба на македонскиот јазик, што беше прва промена на дотогашното законско решение од 1998 година.
Законот, меѓу другото, пропишува задолжително вработување лектори во сите јавни институции и органите на власта, во државни институции, училишта, издавачки куќи и медиуми, што се очекува да доведе до зголемување на интересот за студирање македонски јазик. Задолжително ќе биде лекторирањето на сите материјали со објавување на името на лекторот, а се формира и инспекторат за надзор на примена на Законот.