Го нагласи и значањето на симулациската вежба за цивилна заштита која била реализирана непосредно пред да се случи трагедијата во Кочани, а во која учествувале претставници од МВР, Министерството за здравство, Црвениот крст и од Противпожарната служба на Град Скопје
Околу 3 000 полициски службеници беа ангажирани на денот на трагедијата во Кочани, но и деновите потоа, кои покрај обезбедување на местото на настанот, извршиле увид, ги презеле сите криминалистичко-оперативни активности и биле вклучени во сите дејствија поврзани со спасувањето човечки животи. Ова денеска го кажа министерот за внатрешни работи Панче Тошковски во рамките на Меѓународната конференција наменета за институционалните и клиничките аспекти и решенија по пожарот во Кочани, што денеска се одржува во Скопје.
„Покажавме дека државата и институциите, особено докторите, медицинските сестри и здравствените работници, кога сме заедно, посветени, можеме да одговориме на секаков предизвик. Министерството за внатрешни работи покажа максимална професионална посветеност во делот на транспортот и преземање на сите надлежности за се што беше потребно да се одговори на медицинските служби, најбрзо што може“,
кажа тој.
Посочи дека вкупно 115 повредени лица биле транспортирани до странски здравствени установи, каде што полициските служби продолжиле да обезбедуваат поддршка.
„Специјални полициски сили со две медицински возила дадоа придонес за транспортот на повредени лица, а беа вклучени и двата хеликоптери на МВР. Беше вклучена и граничната полиција, лицата од Одделот за управни работи кои брзо ги издаваа потребните документи за повредените или за нивните семејства“,
рече министерот.
Во излагањето, Тошковски го нагласи и значањето на симулациската вежба за цивилна заштита која била реализирана непосредно пред да се случи трагедијата во Кочани, а во која учествувале претставници од МВР, Министерството за здравство, Црвениот крст и од Противпожарната служба на Град Скопје.
„Оваа вежба навистина беше многу добро организирана и многу корисна не само за припадниците на МВР, кои беа на лице место, го обезбедија настанот, извршија анкетирање со потенцијалните сторители на било какви кривични дела, со сведоците, укажаа помош на жртвите, ги спроведоа до здравствените установи. Беше од голема корист за сите институции кои беа на терен“,
вели тој.
Според него, на трагедија како што е кочанската ретко која држава може да одговори максимално ефикасно, брзо и соодветно.
„Се надевам дека никогаш повторно нема да ни се случи нешто слично“,
рече Тошковски.
Изрази сочувство до семејствата на загинатите и благодарност до сите што учествувале во справувањето со трагедијата.
Министерот за здравство Азир Алиу рече дека повеќе од 400 здравствени работници од јавниот и приватниот сектор со исклучителна пожртвуваност, концентрација и професионализам направија натчовечки напори да спасат животи по трагедијата во Кочани.
Премиерот Христијан Мицкоски рече дека постојат настани во историјата на една држава што не се мерат со време, туку со болката што ја оставаат зад себе, а дека токму таков настан е трагедијата во Кочани.
Ги прочита имињата на сите загинати во пожарот во т.н. дискотека „Пулс“ во Кочани, додавајќи дека луѓето чии животи згаснаа не се бројка, туку се судбини и личности.
Поврзани вести:
- Луѓето чии животи згаснаа во пожарот во Кочани не се бројка, туку се судбини и личности – вели Мицкоски
- Алиу: Не ја забораваме пожртвуваноста на здравствените работници и подадената рака на пријателските земји
- Владата организира Меѓународна конференција за пожарот во Кочани – лекари од странство ќе прават анализа на одговорот на трагедијата