„Обвинетиот подолг временски период сурово и нечовечно постапувал кон оштетената, која спрема него се наоѓала во положба на фактичка и егзистенцијална зависност и подреденост, па поради таквото постапување таа на 2 март извршила самоубиство кое може да му се припише на небрежност на обвинетиот“, соопштија од ОЈО Скопје
Основното јавно обвинителство (ОЈО) Скопје поднесе обвинение против Стојанче Јовановски, сопругот на починатата Ивана од скопско Тафталиџе, за три кривични дела – телесна повреда, односно повреди сторени како продолжено дело на семејно насилство, загрозување на сигурноста и наведување и помагање во самоубиство.
Изнесувајќи детали кои му претходеле на трагичниот настан од 2 март, кога Ивана и нејзината шестгодишна ќерка починаа по пад од зграда во Тафталиџе, од Обвинителството наведуваат дека истиот ден обвинетиот на повеќе локации во Скопје телесно ја повредил својата сопруга. Ја удирал со шлаканици и тупаници поради кои таа во еден момент изгубила свест. Истиот ден, на паркингот зад Кривичниот суд во Скопје, обвинетиот сериозно ѝ се заканил дека ќе нападне врз нејзиниот живот и тело, предизвикувајќи ѝ несигурност, загрозување и страв.
Според обезбедените докази на скопското обвинителство, обвинетиот подолг период нечовечки се однесувал кон својата сопруга која била во фактичка и егзистенцијална зависност и подреденост кон него.
„Поради таквото постапување, таа на 2 март извршила самоубиство кое може да се припише на небрежност на обвинетиот. Обвинетиот издејствувал сега починатата Ивана Јовановска во ноември 2022 година да му го отстапи со Договор за дар својот идеален дел од станот во кој живееле заедно со нивната малолетна ќерка, со тоа што оштетената и детето требало да останат да живеат во станот“,
наведуваат од Обвинителството.
Откако официјално стекнал сопственост над станот, обвинетиот почнал психички и физички да ја малтретира својата сопруга, што особено земало замав во 2025 година. Сè почесто ја тепал и ја омаловажувал во нивниот дом во присуство на нивната малолетна ќерка, но и на јавни места пред други луѓе, заканувајќи ѝ се дека ќе ја избрка од домот во кој живееле. Се заканувал и дека ќе ѝ ја одземе нивната ќерка.
„Кога на критичниот ден жената повторно била изложена на неговото психичко и физичко малтретирање на повеќе локации, како и на неговите закани и навреди, се вратила во станот заедно со детето. Побарала да се качи сама со ќерката во станот за да се спакува и да замине, но обвинетиот инсистирал да се качи со неа и продолжил да ѝ се заканува. Сведок на настанот го оттурнал обвинетиот и заедно се симнале пред зградата за да ја почекаат оштетената да се спакува. Но, малтретирањето ја довело оштетената во состојба на тешка психичка вознемиреност, страв, безнадежност и чувство на безизлезност и таа без разумно да управува и да ги контролира своите постапки, извршила самоубиство скокајќи од терасата на станот од шестиот кат заедно со нивното малолетно дете“,
наведуваат од Обвинителството.
Поради опасност од бегство, скопското обвинителство до Основниот кривичен суд Скопје доставило и предлог за продолжување на претходно одредениот притвор за осомничениот.