fbpx
Свет

Кувајт потврди дека утрово се урнале неколку американски борбени авиони

360степени | 2 март, 2026 09:53

Министерството за одбрана соопшти дека истрагата за причините за инцидентот продолжува

Неколку американски борбени авиони се урнале утрово во Кувајт, но сите пилоти преживеале, соопшти кувајтското Министерство за одбрана. Се вели дека членовите на екипажот безбедно се катапултирале и биле однесени во болница на лекување, каде што е утврдено дека се во стабилна состојба.

Сè уште не е јасно што го предизвикало падот на американските авиони, но инцидентот се случил за време на интензивен ирански копнен оган. Министерството за одбрана соопшти дека истрагата за причините за инцидентот продолжува.

На социјалните мрежи се споделуваат снимки од пад на американски „Ф-15“ во Кувајт, а Иран објави дека неговите сили го собориле авионот.

Пилотот на „Ф-15“ е преживеан, откако успеал безбедно да се катапултира, а по слетувањето за него се погрижила група локални жители.

Засега нема реакција од САД.

Воздушниот сообраќај над неколку земји во регионот е речиси целосно милитаризиран. Кувајт е долгогодишен сојузник на САД и една од клучните логистички точки за американската војска во Персискиот Залив.

Во земјата има важни американски бази и складишта за опрема, а кувајтскиот воздушен простор често го користат американските и сојузничките воени авиони за време на операциите во Ирак, Сирија и пошироко.

Иран утрово започна голем ракетен и беспилотен напад кон Израел, но експлозии се слушнаа и во неколку градови во Персискиот Залив, вклучувајќи ги Доха, Кувајт, Дубаи, Абу Даби и Бахреин.

Силни експлозии одекнаа низ целиот регион, а според првичните извештаи, воздушната одбрана е активирана во неколку земји.

©2026 360 степени, Сите права се задржани