Алиу: За шест од десет контролирани компании за медицинска марихуана е почната постапка за одземање на лиценците

Оваа ригорозна мерка следува во период на засилени вонредни контроли на сите над 40 компании во државата кои поседуваат вакви лиценци

Најмалку шест од вкупно десет досега процесирани компании за одгледување медицинска марихуана се наоѓаат во постапка за одземање на лиценците за работа. Ова го сподели министерот за здравство Азир Алиу во изјава за телевизија Телма и додаде дека овие субјекти не ги исполнуваат законски предвидените услови за вршење на дејноста.

Оваа ригорозна мерка следува во период на засилени вонредни контроли на сите над 40 компании во државата кои поседуваат вакви лиценци. Владата ја иницираше оваа опсежна акција како директен одговор на неодамнешната голема заплена на четириесетина тони нелегално складирана и третирана марихуана.

Поднесена е кривична пријава против 10 лица за запленетите 40 тони марихуана, истрагата и понатаму ќе се проширува – вели Тошковски

Министерот Алиу во оваа рана фаза одби да открие повеќе детали за тоа кои точно неправилности ги утврдила стручната комисија при Министерството за здравство, со образложение дека правната постапка сè уште е во тек.

Тој нагласи дека имињата на компаниите кои ќе останат без дозвола за работа нема да бидат објавени пред вторник и оти тогаш официјално ќе заврши процесот, по што јавноста детално ќе биде информирана за конкретните субјекти и прецизните причини поради кои Комисијата утврдила дека тие повеќе не ги исполнуваат строгите услови.

„Призма“: Во Македонија легален одгледувач, во Србија осомничен за шверц на марихуана

Паралелно со теренските контроли и одземањето на дозволите, ресорниот министер најави и системски промени а рече и оти во следниот период ќе се пристапи кон менување на правилниците кои ја регулираат оваа специфична дејност, со цел да се воведе поголем ред и да се спречат идни злоупотреби.