Претседателката појасни дека употребата на државниот авион во одредени случаи чини помалку отколку патувањето со комерцијални линии за целата делегација
Претседателката Гордана Сиљановска-Давкова смета дека користењето на владиниот авион е порационално решение за државни цели, иако во регионот македонското летало го нарекуваат „авиончето на браќата Рајт“ поради неговата старост.
Таа истакна дека иако постои дилема поради безбедноста, владиниот авион често е единствениот избор за функционално извршување на задачите.
„Не е многу пријатно и самата кажувам дека секогаш имам дилема кога немам друг избор, бидејќи знам дека е старо 25 години, а е купено на старo“,
рече претседателката по завршувањето на настанот за одбележување на денот на мајчиниот јазик.
Сиљановска-Давкова појасни дека употребата на државниот авион во одредени случаи чини помалку отколку патувањето со комерцијални линии за целата делегација.
„Употребата на владиното авионче понекогаш овозможува функционално извршување на државна работа, а е и поевтино од користењето на комерцијален лет“,
изјави Сиљановска-Давкова.
Одговарајќи на новинарски прашања околу користењето на владиниот авион од страна на функционери, прашање што деновиве е актуелно во јавноста, рече дека нејзините колеги од регионот го нарекувале „авиончето на браќата Рајт“ бидејќи е најмал и најстар.
Според Сиљановска-Давкова, набавката на понов, поголем и побезбеден авион би била долгорочно порационална инвестиција. Со поголем капацитет, повеќе лица би патувале одеднаш, а би оделе и новинарите.
„А и ни замеруваат и јас знам дека тоа е мој голем хендикеп што со нас нема новинари, а со нив има и новинари. Новинарите понекогаш доаѓаат со нив“,
рече претседателката Сиљановска-Давкова.
Директорот на Службата за општи и заеднички работи (СОЗР), Ивица Томовски, неодамна најави дека Владата размислува да изнајде начин за набавка на нов владин авион бидејќи, како што рече, сегашниот е склон на чести поправки и е премал за да се користи за соодветна делегација.
Телевизијата Телма пред неколку дена објави на кои релации најмногу се користел владиниот авион. Според податоците, Мицкоски го користел владиниот авион трипати. Еднаш бил до Будимпешта, а на 10 август лани заминал за Сплит. Во тој период медиумите информираа и дека неколку дена Мицкоски ќе одмара во Хрватска. Тој патувал и до Тирана, а за еден лет од Скопје до Белград нема целосни податоци.
Околу информациите за користењето на владиниот авион реагираа и од Социјалдемократскиот сојуз на Македонија (СДСМ), од каде што рекоа дека Мицкоски патувал со владиниот авион на одмор до Јадранското Море, а нема пари за зголемување на минималната плата на 600 евра за работниците.
По обвинувањата на СДСМ, од Владата вчера информираа дека владиниот авион е користен исклучиво согласно прописите и актите за негово користење и дека не постои каква било форма на злоупотреба.
Премиерот Христијан Мицкоски вчера рече дека Владата ќе се откаже од набавката на нов воздухоплов.
„Доколку се урнеме некаде и доколку починеме, тогаш претпоставувам дека ќе им стане јасно на сите дека оваа дебата за некоја идна влада и за некои идни премиери е одвишок и дека е беспредметна“,
кажа тој.
Поврзани вести:
- Владиниот авион најмногу летал за Будимпешта, најчесто го користеле министерот Николоски и претседателката Сиљановска-Давкова
- Владиниот авион е користен исклучиво согласно прописите – велат од владата
- Мицкоски: Ќе се повлечеме од набавката на нов владин авион и ќе се молиме да останеме живи
- СДСМ бара власта да објави кој патувал заедно со Мицкоски во владиниот авион
- Семејството на Мицкоски никогаш не патувало со владиниот авион, велат од Владата