Портпаролот на Кремљ, Дмитриј Песков, нагласи дека не се очекуваат вести по завршениот состанок и оти страните ќе ја продолжат својата работа утре
Во Женева заврши првиот ден од трилатералните преговори за решавање на конфликтот во Украина по состанокот кој траеше четири и пол часа и се одржа на руски и англиски јазик зад затворени врати, изјави извор упатен во преговорите.
Како што рекол изворот за РИА новости, Британците, предводени од советникот за безбедност на премиерот Кир Стармер, Џонатан Пауел, исто така пристигнале на местото на одржување на самитот за да се запознаат со резултатите од разговорите.
Портпаролот на Кремљ, Дмитриј Песков, нагласи дека не се очекуваат вести по завршениот состанок и оти страните ќе ја продолжат својата работа утре.
Истовремено, советникот на претседателот на Украина, Серхи Лешченко, потврди за „Укринформ“ дека разговорите се одржале со присуство на европски советници за безбедност и додаде дека тие не биле непосредно присутни во преговарачката сала. Лешченко наведе дека биле присутни советници од Франција, Германија, Италија и Велика Британија, кои се во постојана врска со учесниците во преговорите. Според него, нивното присуство одговара на интересите на Украина и Европа бидејќи Европа мора да биде на преговарачката маса, а патот на Украина кон ЕУ е неизбежен и корисен за двете страни.
Американскиот претседател Доналд Трамп, пред новата рунда разговори, изјави дека Украина треба што побрзо да седне на преговарачката маса.
Новата рунда преговори меѓу Русија, САД и Украина за украинското решение се одржа во Женева, во хотелот „Интерконтинентал Женева“.
Руската делегација ја предводеше помошникот на рускиот претседател Владимир Путин, Владимир Медински, американската делегација ја предводеа специјалниот пратеник Стивен Виткоф и високиот советник на Белата куќа, Џаред Кушнер, а украинската делегација ја предводеше шефот на кабинетот на украинскиот претседател Володимир Зеленски, Кирило Буданов.
Состаноци на работната група за економски прашања, во која е и генералниот директор на Рускиот фонд за директни инвестиции (РДИФ), Кирил Дмитриев, исто така ќе се одржат во Женева.