„Откако јавно ги разобличивме фактите за непријавените интереси, за фирмите на нејзините синови кои добивале милионски средства од партиските каси и за системското прикривање во рамки на ДКСК – режимот повеќе немаше простор за маневрирање. Сите обиди за маневрирање, за правни акробации и за прикривање зад бирократски флоскули паднаа во вода“, се вели во соопштението од партијата
Партијата Левица смета дека оставката на антикорупционерката Цвета Ристовска од функцијата членка на Државната комисија за спречување на корупцијата (ДКСК) не е личен чин, туку е резултат на разобличување на коруптивните и клиентелистилки врски што ја компромитираа институцијата.
Како што се вели во соопштението на партијата, оставката е признание дека фактите се неоспорни и дека јавноста не може повеќе да се лаже.
Истовремено, нејзината оставка ја оценуваат за директна победа на вистината на јавниот притисок и истрајноста на партијата.
„Откако јавно ги разобличивме фактите за непријавените интереси, за фирмите на нејзините синови кои добивале милионски средства од партиските каси и за системското прикривање во рамки на ДКСК – режимот повеќе немаше простор за маневрирање. Сите обиди за маневрирање, за правни акробации и за прикривање зад бирократски флоскули паднаа во вода“,
се вели во соопштението од партијата.
Во таа насока, Левица бара по оставката на Ристовска во ДКСК да се ревидираат и одблокираат предметите поврзани со директорот на Агенцијата за национална безбедност (АНБ), Бојан Христовски, каде што, како што велат, Комисијата утврди дека нема ништо спорно во неговото назначување и факултетската диплома од Универзитетот каде што токму таа била професорка.
Покрај тоа, партијата бара и ревидирање и на предметите, како што додаваат, со незаконски именуваниот началник на Генералштаб генерал-мајор Сашко Лафчиски, но и тој за поврзаноста на компанијата „Сити аутсорсинг“ со директорот на владината Служба за општи и заеднички работи (СОЗР), Ивица Томовски, и добивањето 161 јавна набавка.
„Ова е само почеток. Ќе им дишеме во врат на сите корумпирани структури на ДПМНЕ без исклучок. Секој функционер што мисли дека може да ја злоупотребува функцијата или да се штити зад партиски чадор, треба да знае дека следниот предмет може да биде токму негов“,
велат од Левица.
Оттаму ги охрабруваат сите вработени во институциите и граѓани што располагаат со информации за корупција, злоупотреби и клиентиелизам, да продолжат да им ги доставуваат.
„Левица ќе ги штити изворите и ќе ја изнесе вистината во јавноста бескомпромисно. Денеска падна една ‘недопирлива‘, утре ќе паднат и други. Борбата продолжува“,
се додава во соопштението.
Антикорупционерката Цвета Ристовска денеска до претседателот на Собранието Африм Гаши поднесе оставка од функцијата членка на ДКСК. Во објаснувањето, Ристовска наведува дека оставката ја поднесува по јавните полемики и сомнежи поврзани со нејзината работа во ова тело.
„По недели јавни полемики и сомнежи изнесени во врска со мојата работа во ДКСК, донесов одлука да поднесам неотповиклива оставка од функцијата членка во ова тело“,
вели таа.
Ристовска посочува дека во текот на нејзината професионална кариера, вклучително и работењето во Комисијата, работата ја извршувала законито, совесно и со најдобра намера.
„Жалам доколку одредени околности, вклучително и можни административни пропусти, доведоа до неосновани сомнежи во јавноста. Во сите ситуации во моето работење во Комисијата во кои постоеше можност за потенцијален судир на интереси барав изземање, согласно законот. Никогаш немав намера да прикријам информација, напротив, ги почитував законските обврски“,
додава Ристовска.
На почетокот на месецов ДКСК отвори два предмети за нивната колешка Ристовска, за проверка на случаи на судир на интереси и непријавување имот поврзани со Ристовска.
Едниот случај, како што објави ТВ Телма, е во врска со фирма на еден од синовите на Ристовска која добивала пари за кампањата за претседателските избори во 2024 година, додека другиот се однесува на наводите дека антикорупционерката во својот анкетен лист не пријавила дека двајцата нејзините синови имаат фирми за маркетинг.