Индексот на цените на храната на ФАО, кој ги следи месечните промени во меѓународните цени на кошничка со глобално тргувани прехранбени производи, во јануари изнесувал просечно 123,9 поени, што е намалување за 0,4 проценти во однос на претходниот месец и 0,6 проценти од нивото од претходната година
Светските цени на храната во јануари се намалени петти месец по ред, а глобалните резерви на житни култури се приближиле до историскиот максимум, се наведува во извештајот објавен денеска од Организацијата за храна и земјоделство на Обединетите нации (ФАО).
Индексот на цените на храната на ФАО, кој ги следи месечните промени во меѓународните цени на кошничка со глобално тргувани прехранбени производи, во јануари изнесувал просечно 123,9 поени, што е намалување за 0,4 проценти во однос на претходниот месец и 0,6 проценти од нивото од претходната година.
Во извештајот е наведено дека цените на житните растенија се зголемени за 0,2 проценти во однос на претходниот месец и покрај незначителното намалување на цените на пченицата и пченката.
Високото ниво на резервите пченица ја неутрализира загриженоста поради временските услови во Русија и САД, а доволните глобални резерви на пченка ги ублажуваат ефектите од неповолните временски услови во Аргентина и Бразил, како и силната побарувачка за етанол во САД.
Спротивно на тоа, во извештајот се вели дека индексот на цените на оризот на ФАО се зголемени за 1,8 проценти во однос на декември, одразувајќи ја поголемата побарувачка за миризливи сорти ориз.
Индексот на цените на растителното масло се зголемени за 2,1 отсто во јануари. Зголемувањето на цените на палминото масло е поврзано со сезонското забавување на производството во Југоисточна Азија и стабилната глобална побарувачка, а цените на соиното масло се зајакнаа поради намалената понуда од Јужна Америка и очекувањата за силна побарувачка од американскиот сектор за биогорива.
„Глобалните цени на сончогледовото масло, исто така, се зголемија, поттикнати од ограничената понуда во регионот на Црното Море. Спротивно на тоа, меѓународните цени на масло од репка се намалија, што одразува голема достапност во Европската Унија по големиот неодамнешен увоз“,
се вели во извештајот.
Цените на месото во јануари се намалени за 0,4 проценти главно поради пониските цени на свинското месо во услови на обилна глобална понуда и намалена меѓународна побарувачка. Најизразено намалување е забележано кај млечните производи, чиј индекс се намали за пет проценти во споредба со декември поради пониските цени на сирењето и путерот.
Индексот на цените на шеќерот се намали за еден процент поради очекуваното зголемување на понудата, особено поради закрепнувањето на производството во Индија и поволните перспективи во Бразил и на Тајланд.