Прашан дали очекува Собранието да го послуша Советот на јавни обвинители, претседателот Башким Бесими појасни дека тие, согласно Законот за јавно обвинителство, мислењето во однос на кандидатите го праќаат до Владата, а потоа откако таа ќе утврди еден кандидат, предлогот го доставува до Собранието за избор
Инаку, Советот на јавните обвинители денеска требаше да одржи седница, но таа беше одложена поради немање кворум, односно отсуство на повеќемина негови членови
Советот на јавните обвинители сè уште не ги добил кандидатурите на петтемина аспиранти за највисоката јавнообвинителска функција – државен јавен обвинител, кои се пријавија на огласот што го распиша Собранието.
Од Владата во вторникот соопштија дека на седница бил донесен заклучокот во однос на кандидатите и дека ќе биде испратен до Советот на јавните обвинители, кој во рок од 15 дена треба да се произнесе и да достави мислење до „Илинденска“ број 2.
Претседателот на Советот на јавните обвинители, Башким Бесими, денеска изјави дека ќе постапат во законскиот рок и ќе дадат мислење до Владата, но откако ќе ги добијат и ќе ги разгледаат кандидатурите.
„До овој момент предлогот со кандидатите пријавени на огласот сè уште не пристигнал (во Советот на јавните обвинители). Кога ќе пристигне, ние во рок од 15 дена ќе дадеме одговор во однос на кандидатите“,
изјави Бесими.
Одговарајќи на новинарски прашање, тој рече дека додека не пристигнат пријавите, не може да даде генерален став во однос на кандидатите, но, како што додаде, тие се познати за јавноста.
„Во принцип, ги знаеме сите кандидати што се пријавени, ќе ги разгледаме, ќе одлучиме на седница и ќе ја известиме Владата во законски рок“,
кажа тој.
Прашан дали очекува Собранието да го послуша Советот на јавни обвинители, Бесими појасни дека тие, согласно Законот за јавно обвинителство, мислењето во однос на кандидатите го праќаат до Владата, а потоа откако таа ќе утврди еден кандидат, предлогот го доставува до Собранието за избор.
„Владата согласно закон ќе даде еден кандидат. Ние можеме да дадеме двајца-тројца или еден, но Владата е таа која го дава предлогот до Собранието. Ние, еве, и во пракса да дадеме позитивно мислење за тројца кандидати, Владата до Собранието ќе предложи еден кандидат. Тоа е ако дадеме позитивно мислење. Ако дадеме негативно мислење, тогаш се подразбира дека Владата не може да предложи кандидат до Собранието“,
рече претседателот на Советот на јавните обвинители.
Инаку, досега ниту Собранието ниту Владата формално не ги објавија имињата на петтемина кандидати за шеф на Јавното обвинителство на Република Северна Македонија. Сепак, во јавноста е познато дека во трка за функцијата се актуелната в.д. државна јавна обвинителка Анита Тополова-Исајловска, обвинителката Ленче Ристовска, судијата од Кривичниот суд, Ненад Савевски, поранешниот претседател на Кривичниот суд, Владимир Панчeвски, и обвинителката од скопското Обвинителство, Лидија Раичевиќ.
Еден од нив би требало да го наследи Љупчо Коцевски, кој лани во декември си поднесе неотповиклива оставка од функцијата, непосредно пред почетокот на собраниската седница на која пратениците требаше да расправаат и да гласаат по предлогот на Владата за негово разрешување.
На негово место како в.д. државен јавен обвинител Советот на јавните обвинители ја назначи обвинителката Тополова-Исајловска, која, според законот, не може да биде на позицијата в.д. шеф подолго од шест месеци.
За потсетување, постапката за избор на нов државен јавен обвинител почна со огласот што го распиша Собранието на 12 јануари годинава, со рок за пријавување од 15 дена од денот на објавувањето во „Службен весник“.
Според членот 62 од Законот за јавно обвинителство кандидатите мора да имаат непрекинат работен стаж од најмалку 10 години како јавни обвинители или судии од областа на кривичното право.
Во членот 64, пак, е уредена процедурата за избор на државен јавен обвинител. Според законските одредби, добиените кандидатури се препраќаат до Владата, по што таа бара мислење од Советот на јавните обвинители за сите кандидати. Советот е должен да достави до Владата образложени мислења во рок од 15 дена, а доколку за ниту еден од кандидатите не добие позитивно мислење од Советот, Владата не може да утврди предлог и му предлага на Собранието да распише нов оглас.
Државниот јавен обвинител Собранието го избира со апсолутно мнозинство, односно за него треба да гласаат најмалку 61 пратеник.
Јавниот обвинител на Република Северна Македонија има мандат од шест години, со право на повторно именување.
Премиерот Христијан Мицкоски, одговарајќи на новинарски прашања, изјави дека од новиот државен јавен обвинител, што допрва треба да биде избран, очекува првин да ги извади предметите што се држат во фиока и за оние каде што има докази за кривични дела да отвори постапка, а за оние каде што ќе процени дека нема такво нешто да бидат затворени.
Инаку, Советот на јавните обвинители денеска требаше да одржи седница, но таа беше одложена поради немање кворум, односно отсуство на повеќемина негови членови. Имено во салата поради здравствени и лични причини, не беа присутни членовите Марјана Илиеска, Ардиан Демири, Фатих Алиу и Душица Димитриеска. Советот, за потсeтување, брои вкупно 11 членови, меѓу кои е и државниот јавен обвинител, кој може да дискутира по точките на дневен ред, ное нема право на глас прин донесувањето одлуки.
За денешната седница, која како што кажа претседателот на Советот Бесими се одлага на неодредно време, на дневен ред беа осум точки. Една од нив беше разгледување на записникот на Комисијата што Советот ја формираше да постапува по Правилникот за обезбедување и гарантирање на самостојноста на јавните обвинители, а по известување од обвинителката Ленче Ристоска. Обвинителката поднесе известување до Советот во кое укажа на искажаните наводи на премиерот Христијан Мицкоски во интервју за порталот „Вечер.мк“, во кое тој ја нарекува медиокритет и потврдно одговара на констатацијата на новинарката дека станува збор за клиентелистичко-политичка матрица.
Членовите на Советот денеска требаше да одлучуваат и по дисциплински постапки во два предмети, како и за објавување огласи за избор на јавни обвинители во ресенското, кочанскотото и Основното јавно обвинителство во Крива Паланка.