Според неа, во текот на четвртата недела од годинава, односно во периодот од 19 и 21 јануари, во земјава се пријавени 1 708 случаи на заболени од грип, што е за 17,2 отсто помалку споредено со претходната недела кога бројот беше 2 062 заболени
Има намалување на бројот на заболени од грип, но сè уште е рано да се каже дека е надминат пикот, оти минатата сезона имавме два пика, соопшти денеска директорката на Институтот за јавно здравје (ИЈЗ), Марија Андоновска, презентирајќи го минатонеделниот број на заболени.
„Можеби ова е првиот, можеби да биде последниот, но не значи дека нема да има нов пик или ново зголемување на бројот на заболени. Оваа сезона се регистрирани три смртни случаи како последица од грип“,
рече таа.
Според неа, во текот на четвртата недела од годинава, односно во периодот од 19 и 21 јануари, во земјава се пријавени 1 708 случаи на заболени од грип, што е за 17,2 отсто помалку споредено со претходната недела кога бројот беше 2 062 заболени.
Од вкупниот број заболени 1 029 се на возраст од 15 до 64 години, а 253 лица се на возраст над 65 години, 243 се деца од пет до 14 години, 183 се деца до четири години.
„Највисока инциденца се регистрира кај децата на возраст до четири години“,
рече Андоновска.
Во земјава, како што додаде, има среден интензитет на активност на вирусот.
Во Дебар и во Кратово се бележи многу висока активност на грипот. Во Охрид, Кавадарци и во Струмица има висока активност, во девет града има средна активност, 12 града се со сезонска активност, а во два града има многу ниска активност.
Андоновска вели дека продолжуваат да важат препораките на ИЈЗ за лицата да се заштитат, а тоа е да се избегнуваат собирања во простории каде што има повеќе лица или доколку е потребно да бидат во такви простории да носат маска.
„Нашите препораки се истите како и претходно – да се остане дома, да се одмара и да се следат советите на матичниот лекар“,
кажа директорката на ИЈЗ.
Оваа сезона во земјава се вакцинирани вкупно 79 099 лица со бесплатна или со комерцијална вакцина.