Радев ѝ ја предаде функцијата на Јотова: Ова е мој последен ден како претседател и прв ден како граѓанин кој верува во промени во Бугарија

Во последната објава на социјалните мрежи како шеф на државата, Радев рече дека му е драго што граѓаните пред девет години ја поддржале неговата претседателска кандидатура, додавајќи дека поддршката од нив продолжува и натаму

Уставниот суд на Бугарија денеска ја потврди оставката на Радев која тој најави дека ќе ја поднесе на почетокот на неделава, поттикнувајќи ги шпекулациите дека ќе формира своја политичка партија за претстојните парламентарни избори

По девет години како шеф на Бугарија, Румен Радев денеска ја напушти претседателската функција.

На главниот влез на претседателската зграда во Софија го испрати потпретседателката Илијана Јотова, која по денешната пресуда на Уставниот суд, сега ја извршува функцијата шефица на државата. Таа ќе ја извршува претседателската функција до јануари 2027 година, кога формално требаше да заврши мандатот на Радев.

Уставниот суд на Бугарија денеска ја потврди оставката на Радев која тој најави дека ќе ја поднесе на почетокот на неделава, поттикнувајќи ги шпекулациите дека ќе формира своја политичка партија за претстојните избори.

• Уставниот суд на Бугарија ја потврди оставката на претседателот Румен Радев

На заминување од претседателската зграда, Радев беше пречекан од толпа граѓани.

Во последната објава на социјалните мрежи како шеф на државата рече дека му е драго што граѓаните пред девет години ја поддржале неговата претседателска кандидатура. Вели дека поддршката од нив продолжува и натаму.

„Денес беше мојот последен ден како претседател, но и мојот прв ден како граѓанин кој, заедно со сите Бугари, верува дека со заеднички напори можеме да ја промениме Бугарија, да ја заштитиме демократијата, да го почитуваме законот, да го забрзаме економскиот развој. За секој од нас да се чувствува заштитен, слободен и достоен граѓанин на европска Бугарија. Не можат да го запрат бранот затоа што сме многу, затоа што сме заедно и затоа што нашата кауза е заедничка – Бугарија. Ми беше чест!

пишува Радев во објава на Фејсбук.

На својата колешка Илијана Јотова, која стана првата жена претседател на Бугарија, ѝ посака успех и ѝ се заблагодари за професионалноста, посветеноста и силната поддршка.