Од „Даунинг стрит“ соопштија дека Стармер во разговорот со Трамп јасно навел оти е погрешно воведување царини за сојузниците поради стремежот кон колективната безбедност на НАТО
Светските лидери започнаа интензивна дипломатска акција за смирување на тензиите откако американскиот претседател Доналд Трамп најави царини за европските сојузници доколку Данска не го продаде Гренланд. Британскиот премиер Кир Стармер денеска телефонски разговараше со Трамп, но и со премиерката на Данска, и лидерите на Европската комисија повторувајќи го во сите разговори ставот дека безбедноста на далечниот север е приоритет за сите НАТО сојузници за да се заштитат евроатлантските интереси.
Од „Даунинг стрит“ соопштија дека Стармер во разговорот со Трамп јасно навел оти е погрешно воведување царини за сојузниците поради стремежот кон колективната безбедност на НАТО. Ова доаѓа како одговор на најавата на Трамп дека од 1 февруари ќе воведе царини за осум европски држави, кои би можеле да пораснат до 25 проценти од 1 јуни, сè додека не се постигне договор за целосна и комплетна продажба на Гренланд, потег што американскиот претседател го правда со засиленото присуство на Русија и Кина на Арктикот.
Во дипломатските напори се вклучи и генералниот секретар на НАТО, Марк Руте, кој потврди дека денеска имал телефонски разговор со Трамп посветен токму на безбедносната ситуација на Гренланд и Арктикот. Руте најави дека ќе продолжат да работат на ова прашање и дека се радува на личната средба со Трамп во Давос, која треба да се случи подоцна оваа недела. Додека траат разговорите на високите нивоа, шефот на данската дипломатија Ларс Локе Расмусен, од заедничката прес-конференција во Осло со неговиот норвешки колега Еспен Барт Ајде, испрати предупредување дека глобалниот фокус се изместува. Тој кажа дека и покрај заканите од САД, Копенхаген останува посветен на барање дипломатско решение.
Претходно, данската премиерка Мете Фредериксен испрати остра порака по најавите на американскиот претседател Доналд Трамп за воведување царини кон осум европски земји доколку не се постигне договор за продажба на Гренланд. По објавувањето на заедничката изјава на Данска, Финска, Франција, Германија, Холандија, Норвешка, Шведска и Велика Британија, Фредериксен истакна дека нејзината влада имала интензивен дијалог со сојузниците и дека добиваат силна поддршка.