Според официјалните податоци, во протестите беа оштетени 350 џамии, 400 болници а бројот на загинати варира во зависност на изворите од 300 до 2 900 демонстранти
Во првото јавно обраќање по неколкудневен молк, иранскиот врховен лидер, ајатолахот Али Хаменеи го обвини американскиот претседател Доналд Трамп дека е виновен за жртвите и штетите кои настанаа за време на масовните демонстрации и протести во Иран кои започнаа кон крајот на минатата година. Тој рече оти Трамп е виновен и за клеветите кои биле изнесени против иранскиот народ.
„Последните анти-ирански немири беа поинакви бидејќи американскиот претседател лично се вмеша во нив“,
напиша Ајатолахот.
Дополнително, на социјалната мрежа „Х“ напиша и оти од почетокот на Исламската револуција до денес, САД ја изгубила контролата врз Иран и оти Американците сакаат да воспостават контрола врз Иран на воен, политички и економски план повторно, дополнувајќи дека ова не е ексклузивна замисла на сегашниот претседател, туку дека тоа претставува стратешка цел на Америка повеќе децении.
The recent sedition was orchestrated by the US. The US did the planning and took action. The US’s goal is to devour Iran.
— Khamenei.ir (@khamenei_ir) January 17, 2026
Веќе неколку денови, во Иран нема нови протести, а властите започнаа со процена на штетите предизвикани во немирите. Според официјалните власти, оштетени се 350 џамии, како и 400 болници и возила на итна помош. За време на протестите иранските власти го блокираа пристапот до интернет во земјата, а според организациите за човекови права за време на немирите загинале 2 885 демонстранти, додека пак иранските власти тврдат дека загинати се само 300 луѓе.