Случајот веќе бил разгледан од стручен колегиум и од Комисијата за квалитет, а од ДСЗИ додаваат дека доставиле иницијатива до министерот за здравство за формирање комисија за стручен надзор
Државниот санитарен и здравствен инспекторат (ДСЗИ) денеска спровел вонреден инспекциски надзор во ЈЗУ Општа болница со проширена дејност – Кавадарци, по наредба на министерот за здравство. Надзорот е во врска со третманот и лекувањето на два и пол месечното доенче У.М на оделот за педијатрија во таа здравствена установа, кое почина 14 јануари.
Според извештајот на ДСЗИ, доенчето било примено во болницата на 12 јануари со упат од матичен лекар поради чести повраќања и поспаност. На самиот прием, детето било прегледано од педијатар, при што биле направени биохемиски иследувања и била поставена дијагноза R11 (гадење и повраќање).
Во моментот на хоспитализацијата детето било без покачена телесна температура, имало висока сатурација и било свесно. По приемот, на бебето му била вклучена инфузиона терапија, а добивало и исхрана со адаптирано млеко.
Од ДСЗИ велат дека на 13 јануари состојбата на бебето била стабилна, а на 14 јануари анализите на урина биле уредни. Редовната визита во 15:30 часот истиот ден покажала дека здравствената состојба е се уште стабилна.
Во вечерните часови на 14 јануари, 20:48 часот, мајката и медицинската сестра забележале дека доенчето не дише.
„Веднаш е префрлено во соба за интервенции каде е констатирана генерализирана цијаноза. Педијатар и специјалист анестезиолог спровеле реанимација по протокол која траела 40 минути, но без одговор“,
стои во соопштението на ДСЗИ.
Како официјална причина за смртта во извештајот на анестезиологот е наведена „ненадејна смрт на доенче“.
Случајот веќе бил разгледан од стручен колегиум и од Комисијата за квалитет, а од ДСЗИ додаваат дека доставиле иницијатива до министерот за здравство за формирање комисија за стручен надзор.
Точната причина за смртта официјално ќе биде потврдена по завршување на патоанатомската обдукција која е во тек.