Со ова, како што велат од Министерството за дигитална трансформација, вкупниот број на досега забранети нелегални страници изнесува 307
Се ограничува пристапот до уште 33 нелегални веб-страници и апликации за онлајн игри на среќа – објави Министерството за дигитална трансформација. Налогот е потпишан од страна на министерот Стефан Андоновски и е доставен до Агенцијата за електронски комуникации која во рок од пет дена треба да го достави до операторите на електронски комуникациски мрежи за негово спроведување.
„Со најновиот налог се опфатени дополнителни 33 нелегални веб-страници, што значи дека вкупниот број на досега забранети нелегални страници изнесува 307“,
наведуваат од Министерството за дигитална трансформација.
Оттаму ја споделија листата на новите 33 нелегални веб-страници до кои се суспендира пристапот и порачаа дека ќе продолжат со континуирани мерки за сузбивање на нелегалното приредување игри на среќа на интернет.
Во мај минатата година, министерот за дигитална трансформација, Стефан Андоновски објави дека го потпишал првиот налог за забрана на 53 нелегални приредувачи на онлајн игри на среќа.