Според опозициската партија, новото задолжување за граѓаните ќе значи поголеми камати, помалку средства за социјални програми, за здравството и образованието, како и поголем ризик од криза во случај на пораст на глобалните каматни стапки
Издавањето на 10. eврообврзница со по две транши од по 500 милиони евра, за што вчера информираше Министерството за финансии, според опозицискиот Социјалдемократски сојуз на Македонија (СДСМ) е уште еден доказ дека државата нема пари за функционирање, бидејќи , како што наведуваат од „Бихакќа“, во буџетот постои дупка од една милијарда евра.
Во писменото соопштение оттаму велат дека за ваквата состојба реагирале уште во декември, а власта наместо да признае дека ја признае дупката во буџетот, таа новото задолжување го објавува како успех на Министерството за финансии и како триумф на економијата.
„Во моментот кога Владата се фали со ‘импресивната’ побарувачка од над четири милијарди евра за десеттата еврообврзница во износ од милијарда евра, вреди да се потсетиме дека ова не е приказна за успех, туку за нужда“,
велат од СДСМ.
Според опозициската партија, новото задолжување за граѓаните ќе значи поголеми камати, помалку средства за социјални програми, за здравството и образованието, како и поголем ризик од криза во случај на пораст на глобалните каматни стапки.
Наместо да се фали со задолжувањата, од СДСМ велат Владата треба да објасни како ќе обезбеди одржливост на финансиите без постојано потпирање на странски кредити.
„Министерството за финансии истакнува диверзифицирана база на инвеститори од Германија, САД и Велика Британија, конкурентни каматни стапки (3,875% за четиригодишната и 4,750% за осумгодишната транша) и доверба во реформските планови. Но, под оваа сјајна фасада се крие сурова реалност, ова задолжување е директен одговор на проблемите со финансиите и буџетскиот дефицит. Оваа ‘доверба на инвеститорите’ што Владата ја слави, всушност е сигнал дека земјата мора да се задолжи по цена на зголемување на вкупниот долг, кој веќе надминува 60% од БДП според ЕУ-стандардите“,
наведуваат од Социјалдемократскиот сојуз.
Оттаму додаваат дека идентичен бил исходот со, како што велат, контроверзниот заем од Унгарија од една милијарда евра во 2024 година, кој од „Бихаќка“ уште тогаш го оцениле како ризичен и политички мотивиран.
Последното задолжување со издавање на 10. еврообврзница, според СДСМ е уште доказ дека она што партијата го зборувала со месеци почнало да се остварува, а тоа дека буџетскиот дефицит не исчезнува, а долговите само се префрлени на идните генерации.
„Време е за одговорна политика, а не за спинување на долговите како победа“,
порачуваат од „Бихаќка“.
Министерството за финансии (МФ) вчера соопшти дека успешно ја реализирало аукцијата за издавање на 10. еврообврзница со две транши од по 500 милиони евра, со рок од четири години и со рок од 8 години, која, како што наведоа оттаму, дополнително говори за довербата во реформските планови на Министерството и на Владата. Дека станува збор за успех, од Министерството како еден од аргументите го наведоа и тоа што последното пласирање обврзница со рок на доспевање од осум година било постигнато пред повеќе од 20 години.
„Само еден час по објавувањето на почетните каматни стапки, побарувачката од инвеститорите достигна импресивни две милијарди евра, со диверзифицирана база на инвеститори ширум светот, вклучувајќи еминентни институционални инвеститори од Германија, САД и Велика Британија. Пред отворањето на американскиот пазар, книгата на инвеститори достигна дури три милијарди евра, а по неговото отворање максималната понуда надмина четири милијарди евра, што претставува исклучителен показател за силната доверба во економските политики и стабилноста на земјата“,
соопштија вчера од МФ.
Со оваа еврообврзница, планирана во Буџетот за 2026 година, како што наведоа од Министерството, ќе се изврши исплата на еврообврзницата издадена во 2020 година во износ од 700 милиони евра и се обезбедуваат средства за буџетскиот дефицит кој е насочен кон реализација на развојните проекти.