Без техничка влада, додаваат од опозициската партија, не може да има праведни избори, нема контролен механизам и нема фер избори и затоа таа мора да остане
Споредбите со земјите од ЕУ како аргумент за укинување на техничката влада се класична манипулација, реагираат од СДСМ по најавата од Владата дека премиерот Христијан Мицкоски утре ќе одржи лидерска средба на која, меѓу другото, ќе се разговара за укинување на техничката влада, а на која социјалдемократите нема да присуствуваат.
„Никаде во Европа нема ваква корумпирана влада. Тендер коалицијата ВМРО-ЗНАМ не ја сака техничката влада, затоа што кога ќе влезе министер од опозиција, ќе има увид во сите документи, во сите злоупотреби во целиот коруптивен систем. Скандалот со ИПАРД 3 и злоупотребите на европските пари, за кои е приведен директор од ВМРО, се уште еден пример дека влез на опозициски министер ќе значи отворање и на другите криминални шеми во министерството. Од тоа се плаши тендер коалицијата. Не сакаат техничка влада, затоа што тоа ќе значи отворање на Пандорината кутија на криминалните тендери“,
велат од СДСМ.
Без техничка влада, додаваат оттаму, не може да има праведни избори, нема контролен механизам и нема фер избори и затоа таа мора да остане.
Премиерот и претседател на ВМРО-ДПМНЕ, Христијан Мицкоски, утре во Клубот на пратениците ќе одржи лидерска средба со претседателите на парламентарните партии кои имаат пратенички групи во Собранието.
Од опозициските партии засега потврда дека ќе учествуваат на средбата има само од Левица, додека лидерот на СДСМ, Венко Филипче, го одби повикот за лидерска средба за укинување на техничката влада обвинувајќи дека Мицкоски бара алиби за распишување предвремени избори.