Министерството за правда на САД поднесе тужба и побара судска забрана за објавување на мемоарите на поранешниот советник за национална безбедност Џон Болтон за неговото работење во Белата куќа.
Во тужбата поднесена на 16 јуни се наведува дека делови од новата книга содржат класифицирани информации што би можеле да предизвикаат „непоправлива штета“ за американската национална безбедност.
Судската постапка доаѓа еден ден откако претседателот Доналд Трамп изјави дека Болтон нема да го почитува законот доколку книгата биде објавена.
Книгата на Болтон, „Собата каде што се случи: Мемоари од Белата куќа“, требаше да биде објавена на 23 јуни.
Трамп му даде отказ на Болтон минатиот септември по 17 месеци како советник за национална безбедност.
Издавачот „Симон и Шустер“ ги опиша мемоарите како „книга која Доналд Трамп не сака да ја прочита“.
Во книгата, според извадокот на издавачот, Болтон опишува хаотична администрација која, наводно, извршила повеќе престапи во странство, како на пример притисокот врз Украина за да го испита политичкиот ривал на Трамп, поранешниот потпретседател Џо Бајден.