Од ЈСП „Скопје“ наведуваат дека јачината на ветерот ги надминува дозволените граници за непречено и безбедно функционирање на жичницата
Поради засилен ветер, жичницата на Водно денеска нема да работи, информираат утринава од Јавното сообраќајно претпријатие (ЈСП) „Скопје“. Оттаму наведуваат дека јачината на ветерот ги надминува дозволените граници за непречено и безбедно функционирање на жичницата.
„Надлежните служби ја следат состојбата на терен и во оној момент кога ќе се создадат соодветни временски услови за работа, жичницата ќе продолжи со непречено превезување на патниците“,
наведуваат од ЈСП „Скопје“.
Претходно вчера од ЈСП најавија можно привремено редуцирање на одредени автобуски линии поради ниските температури и најавите за можни врнежи од снег кои ќе го зафатат Скопје и околината. Поради евентуалната непроодност на улиците, како што соопштија, дел од линиите ќе сообраќаат до локации кои, согласно процените, ќе бидат оценети како безбедни и проодни за автобусите на ЈСП „Скопје“.